Landslide sa Balamban

CEBU, Philippines - Tungod sa pag-ulan-ulan, duha ka bukirang barangay sa lungsod sa Balamban ang naigo sa landslide ug ang midahili nga yuta mitabon sa Cebu Transcentral Highway sugod niadtong miaging gabii hangtod kagahapon.

Subay niini, ang Philippine Atmospheric Geophysical and Astronomical Administration sa Mactan mipahibalo nga magpadayon gihapon ang pag-ulan-ulan sa Kabisay-an, lakip na dinhi sa Sugbo.

Si PAGASA-Mactan weather forecaster Ella Comahig mipahibalo nga ang dautang panahon bunga sa low pressure area nga nahulma sa Guian, Eastern Samar.

Gipahibalo hinuon ni Comahig nga hingpit nang nakabiya sa Pilipinas ang bagyong Bising nga miduaw dinhi sa Sugbo niadtong miaging adlaw hinungdan nga dul-an sa dos mil ka mga pasahero ang na-stranded tungod sa paggapos sa Philippine Coast Guard sa mga barko paingon sa mga silinganang lalawigan.

Si PO2 Cesar Climaco sa Balamban Police Station mibutyag sa  Banat News nga ang mga barangay nga nakasinati sa maong pagdahili sa yuta mao ang Sitio Kuros-Kuros, barangay Bayong ug Sitio C, sa barangay Cansumoroy sa naasoy’ng lungsod.

Matud pa ni PO2 Climaco nga ang mitabon nga yuta sa karsada sa transcentral highway maoy nakapabara sa trapiko hangtod kagahapon sa buntag.

Gipatak-opan dayon nila ang karsada ug wala paagii sa mga motorista tungod sa kadelikado kay ang dakong bahin sa karsada hingpit nga natabonan sa midahiling yuta ug mga bato gikan sa bukid.

Gawas sa yuta, ang lapok nga midahili gikan sa bungtod ug gianod sa baha maoy naghatag og dugang peligro sa dapit sa highway diin kini mibuhagay.

Hinuon ang mga sakop sa engineering department sa munisipyo sa Balamban, dala ang ilang mga heavy equipment, mihimo dayon og dinaliang pagpanglimpyo sa highway kagahapon sa buntag hangtod nga nakaagi na ang mga sakyanan dihang nahawan na ang maong dapit.

Gibutyag ni PO2 Climaco nga hangtod kagahapon sa ala l sa kahaponon, padayon pa ang paghinlo sa karsada aron pagseguro nga luwas na ang tanang mga motorista nga mosubay sa maong dalan.

Hinuon mapasalamaton sila nga walay mga panimalay nga naangin ug walay kinabuhi nga nakalas sa maong landslide.

Midugang si PO2 Climaco nga ang maong lugar pirme lang madahilian sa yuta gumikan sa kahumok matipak sa mga bato ug yuta niini nga bantayanan kaayo sa mga molupyo.

Dinhi sa siyudad sa Sugbo, si Konsehal Gerardo Carillo nagkanayon nga pabiling alerto ang Cebu City Disaster Coordinating Council karon nga padayon ang pag-ulan-ulan.

Sumala pa ni Carillo nga 24-oras ang gihimong monitoring sa CCDCC, ilabi na sa mga lugar sama sa Sirao, Sinsin, Binaliw, Sudlon ug mga silingang bukirang barangay nga nailang landslide-prone area.

Gipahimangnoan na sa CCDCC ang mga delikadong barangay sa pagbalhin lang una paglikay sa kadaot.  -  BANAT NEWS