Dalagita gi-rescue

CEBU, Philippines - Giluwas sa mga sakop sa Criminal Investigation and Detection Group-7 (CIDG) sa miaging gabii ang usa ka dalagita nga anak og French National sulod sa usa ka mental institution sa barangay Canduman, dakbayan sa Mandaue.

Sila si Helen ug Mary Jean Retuya, mga iyaan sa dalagita   miadto sa CIDG-7 ug maoy nangayo og pakitabang nga ma-rescue ang ilang pag-umangkon kay gipangayoan sila og P200,000 sa nagdumala sa Panaglaom Mental Institution isip bayad sa pag-istar sa maong dalagita.

Ang inahan sa maong 16 anyos nga dalagita kasamtangang tua sa gawas sa nasud uban sa iyang langyaw nga kapikas ug gibilin lang ang dalagita uban sa manghod niining usa usab ka menor de edad nga lalaki.

Gumikan sa hangyo sa mga hingtungdan, miresponde dayon sila   SPO2 Delfin Buntoyan ug SPO4 Edmund Junco ug mga kaubanan sa CIDG-7 ug gisusi dayon ang maong institusyon.

 Didto hisayri sa mga otoridad nga ang maong dalagita didto magpuyo sa habagatang bahin sa dakbayan sa Sugbo ug gidagit sa gihinganlan og Dyna Pineda ug didto ihatod sa PANAGLAOM Mental Clinic.

Si SPO4 Junco mibutyag sa DYDD nga sa ilang pag-abot sa maong hospital wala dayon sila pasudla apan dihang napasabot ang tinugyanan niini, gipasulod na sila.

Si Police Superintendent Richie Posadas sa dihang nahinabi sa usab sa Banat News mibutyag nga ang inahan diay sa dalagita maoy nagsugo nga ipaslak sa nahisgutang Institution ang iyang anak.

Dihang nakuha na sa mga otoridad ang bata nasuta nga wala kini kadaot sa lawas ug ila kining gihatag ngadto sa mga iyaan sa bata.