Magbantay sa Sensenmilia

CEBU, Philippines - Si Provincial Board member Victor Maambong mipasidaan sa publiko batok niining bag-ong matang sa ilegal nga drugas nga gitawag nga Sensenmilia.

Sa samang higayon iyang giawhag ang Philippine Drug Enforcement Agency (PDEA) nga mohatag og subsob nga information campaign labot sa pagdagsa dinhi sa nasud niining maong druga nga laing matang sa marijuana.

Sa gipasar nga resolusyon, gibutyag ni Maambong nga nakadawat siya og kasayoran nga nakasulod na karon sa nasud ang sensenmilia, nga laing matang sa gikahadlokang ilegal nga drugas kansang epekto makapito pil-a ang kabug-at ug kadaot niini ngadto sa mogamit, itandi sa marijuana.

Tungod sa kagrabi sa epekto niini, si Maambong nagkanayon nga kinahanglang ang PDEA makig-alayon sa uban pang ahensya nga naggukod sa mga binuang nga bisyo, nga kinahanglang pakgangon kini sa dili pa makakuyanap dinhi sa lalawigan sa Sugbo ug kasikbit nga lugar.

Gitataw usab ni Maambong nga panahon na karon nga ang publiko magmabinantayon na pag-ayo aron nga dili makahatag og dakong kadaot sa katilingban kining Sensenmilia.

Midugang si Maambong nga angayan nga unahon sa pagsabwag og kasayoran kalabot ning bag-ong matang sa illegal nga drugas mao ang mga eskuylahan gikan sa elementarya, sekondarya, kolehiyo ug unibersidad. - BANAT NEWS