PO3 Burlas para Tuburan

CEBU, Philippines - Ang kontrobersiyal nga polis sa Minglanilla nga si PO3 Glen Burlas gipalabay ni Cebu Provincial Police Office director Sr. Supt. Carmelo Valmoria ngadto sa Tuburan tungod sa mga kasong kriminal ug administratiba nga giatubang niini.

“Aron makita usab ang tinuoray’ng kaisog ni PO3 Burlas sa mga military nga isog adto man na sila ibutang sa Mindanao o Basilan, siya adto sa Tuburan,” si Valmoria nagkanayon.

Nasayran nga si PO3 Burlas gireklamo sa inahan ug anak nga sila si Priscilla ug Maribell Caballero human sila gihulga niini niadtong Martes sa dihang duna silay gireklamong higala sa Minglanilla Police Station.

Ang mag-inahan nagkanayon nga si PO3 Burlas mihulga kanila pinaagi sa pag-ingon: “Ayaw mo patuga-tuga bisag asa pa ta magkita, anad nako bisag asa pa labay duha ra mo ka bala.”  - Guam Logroño (BANAT NEWS)