CEBU, Philippines - Si Senador Mar Roxas mipahibalo nga ang iyang buhatan naghatag karon og libreng legal assistance ngadto sa tanang plan holders nga nabiktima sa mga pre-need companies nga natak-opan tungod sa pagpanibat sa mga tag-iya niini.
Sumala pa ni Roxas nga gihimo niya kini aron adunay mobarog nga mga biktima sa mga pre-need companies, sama sa Legacy Consolidated Group nga gipanag-iya ni Mayor Celso de los Angeles sa Sto. Domingo, Albay.
Ang mga plan holders nga adunay mga pending claims o kaso mahimong motawag sa buhatan sa senador sa cellphone number 0919-6276927 aron pakisayran ang libre serbisyo nga gihatag sa senador.
Si Roxas nag-organisar usab og grupo sa mga abogado nga motagad sa mga panginahanglanong legal sa gatusan ka mga plan holders nga naggukod karon nga makuha ang ilang hinaguan nga dugay-dugay na nga natanggong tungod sa binuang sa mga tag-iya sa pre-need companies, sama sa Legacy. - Romeo Limpangog (BANAT NEWS)