Ms. Cebu organizers ikiha

CEBU, Philippines - Mopasaka gyud og kasong kriminal o sibil ang pamilyang Burden batok sa mga organizer sa Miss Cebu 2009 human mabulabog ang texters’ choice award nga nahatag ngadto sa laing kandidata.

Kini pormal nga gipadayag sa mga Burden atol sa ilang gipatawag nga press conference diha sa ilang panimalay sa barangay Lahug.

Nabulilyaso ang nahisgutang special award dihang lain nga kandidata ang gihatagan niini ug dili ang tinuod nga nidaug nga si Kimberly Therese Burden.

Kini ang hinungdan nga niprotesta ang pamilyang Burden partikular na ang inahan ni Kimberly nga si Dr. Rowena Burden.

Usa ka formal complaint ang gisang-at sa doktora ngadto sa Cebu City Tourism Commission (CCTC) nga maoy tigpasiugda sa Miss Cebu.

Apan wala matagbaw si Dr. Burden sa resulta sa imbistigasyon nga gipahigayon sa komitiba nga gitukod ni CCTC acting chairman Hilario Davide III.

Gitumbok sa komitiba ug gipalig-on usab sa CCTC nga ang marketing consultant niini nga si Bruce Bollozos maoy nakaingon sa bulilyaso.

Nangayo na og pasaylo ang CCTC ngadto sa pamilyang Burden ilabi na kang Kimberly ingon man sa iyang mga higala ug mga tigpaluyo.

Sa samang higayon gimanduan usab sa CCTC si Bollozos nga mangayo og pasaylo sa publiko partikular na ngadto sa pamilyang Burden.

Wala matagbaw si Dr. Burden niini uban sa paghulagway nga kulang ang resulta sa gihimong pakisusi hinungdan nga sila misang-at og kaso ngadto sa korte.

Gipadayag hinuon sa doktora nga sila mangita pa og dugang mga ebedensiya alang sa pagpalig-on sa kaso nga ila unyang ipasaka.

Matud ni Dr. Burden nga dili mahimo nga si Bollozos lang ang manubag sa kadanghag niini kun dili lakip na ang pipila ka sakop sa CCTC.

Partikular nga ginganlan sa doktora nga lakip sa manubag mao ang project chairperson sa Miss Cebu 2009 nga si Philip Rodriguez.

Labaw sa tanan si acting mayor Michael Rama, nga giingon ni Dr. Burden nga maoy chairman sa CCTC atol sa pagpahigayon sa nahisgutang beauty pageant.

Gipaniguro ni Dr. Burden nga sulod sa duha ka buwan, ila nang maduso ngadto sa hukmanan ang kaso nga ilang ipasaka batok sa mga organizer sa Miss Cebu 2009.  -  BANAT NEWS