Gidaghanon sa sidewalk vendors gipasusi sa City Hall

CEBU, Philippines - Gipasusi karon ni acting Mayor Michael Rama ang gidaghanon sa tanang mga sidewalk vendors, street traders o sidewalk traders sa dakbayan.

Gusto ni Rama nga makita ang tinud-anay nga hulagway sa mga sidewalk vendors aron maoy iyang basehan sa paghatag og tukmang solusyon sa maong problema.

“Aron ato gyud nga makita ba aron ang atong approach sa pag-address aning mga informal settlers, informal business is data-based,” sumala ni Rama.

Tulo ka grupo karon ang gisangunan ug gitahasan sa acting mayor pagpahigayon og survey sa mga street traders dinhi sa dakbayan.

Kini mao ang labaw sa Team Sugbu nga si Dennis Jabonero, ang in-charge sa Downtown Revitalization nga si George Chiu ug si Urban Poor Consultant Gerry Marquez.

Gusto ni Rama nga mapagawas ang resulta sa labing dali nga panahon tungod usab sa iyang panlantaw nga gitinguhang makab-ot.

Nasayran gikan sa presidente sa Cebu City United Vendors Association (CCUVA) nga si Maria Pino-Buanghug nga mokapin na sa 10 mil ang ilang mga sakop.

Kadaghanan sa mga sidewalk vendors nga nagkatag sa daplin sa kadalanan sa dakbayan partikular na sa downtown area giingong mga sakop sa CCUVA. – BANAT NEWS