CEBU, Philippines - Nagtingkagol sa Talisay City detention cell ang usa ka 37-anyos nga lalaki human kini masakping naghupot og shabu sa usa ka checkpoint nga gihimo sa mga polis ug sa Talisay City Intelligence Bureau sa barangay Pooc sa nahisgutang siyudad niadtong Lunes sa gabii.
Ang suspetsado mao si Leopoldo Rivera, taga barangay Tubod, lungsod sa Minglanilla.
Si PO3 Rico Emperwa kinsa kuyog sa nahisgutang check point sa pakighinabi sa Banat News kagahapon nagkanayon nga si Rivera nagsakay og motorsiklo gikan sa barangay Biasong apan sa paghiabot niini sa checkpoint sa Pooc, gisita siya sa kapolisan kay walay gitangkil nga plate number ang iyang sakyanan.
Matud ni Emperwa nga sa paghunong sa suspek, may giitsa kining butang sa yuta ug dihang gihiling sa kapolisan nakita nila ang lima ka silver nga pakete.
Unya dali kining gidala sa kapolisan ngadto sa crime laboratory ug dihang nasuta nga shabu, si Rivera gibalhug dayon sa prisohan sa Talisay.
Kasong paglapas sa Comprehensive Dangerous Drugs Act maoy gipasaka batok sa maong supetsado. – BANAT NEWS