Midaog sa 'Texters Choice' si Ms. Burden

CEBU, Philippines -  Migawas sa imbestigasyon sa Cebu City Tourism Commission (CCTC) kabahin sa kontrobersyal nga Miss Cebu 2009 nga si Kimberly Therese Burden gyud ang midaog sa “Texter’s Choice Award,” ug nitumaw nga sad-an si Bruce Bollozos.

Kini maoy resulta sa gipahigayong fact-finding inquiry sa komitiba nga gipanguluhan ni Konsehal Gerardo Carillo sa 13 ka mga tawong giimbestigahan.

Nasutang tinuod nga nidaug sa nahisgutang special award si Burden nga mao usab ang 2nd runnerup sa nahisgutang beauty pageant.

Sa 12 ka pahinang committee report ni Carillo gitumbok niini nga si Bruce Bollozos maoy nihatag og sayop nga pangalan sa winner maong ang natawag sa announcer mao si Kris Tiffany Janson nga mao usab ang nakoronahan nga Miss Cebu 2009.

Gibasol usab sa komitiba ang Globe nga maoy sponsor sa Texters’ Choice Award tungod kay kini giingong napakyas paghatag og certificate o official document nga maoy basehan pagdeklarar sa tinuod nga mananaug sa special award.

Apan taliwa sa sayop nga nahimo ni Bollozos ang komitiba ni Carillo igo lang nirekomendar nga papangayuon kini og pasaylo ingon man ang CCTC ngadto sa pamilyang Burden partikular na ngadto kang Kimberly.

Ang CCTC pinaagi sa acting chairman, acting vice mayor Hilario Davide III, gitakdang mopapublikar og opisyal nga pamahayag nga mangayo og pasaylo sa pamilyang Burden ilabi na kang Kimberly, supporters ug mga higala niini.

Kini tungod sa giingong iresponsableng sayop ni Bollozos nga niresulta sa sayop usab nga pagpahibawo sa mananaug sa nahisgutang special award.

Sa samang higayon gimanduan usab si Bollozos sa CCTC nga mangayo og pasaylo sa publiko tungod sa dili niini maayong pagkadala sa event.

Sa pikas bahin, giawhag usab sa CCTC ang Globe Telecom pagpasabot sa komisyon nganong kini walay klarong sistema pagsiguro sa integridad sa contest.

Ang CCTC nakahukom na nga dili na iapil ang mga “Texters’ Choice Award” o bisan unsang side event atol sa coronation night sa umaabot nga Miss Cebu beauty pageant.

Samtang kabahin sa laing reklamo nga gustong paimbestigahan ni Dr. Rowena Burden, inahan ni Kimberly, sa CCTC mao ang alegasyong di patas nga pagpili tungod kay giingong wala man makaapil si Janson sa initial ug final screening, apan ang komisyon nibarog sa integridad sa pageant.

Dihang gikuhaan og reaksyon ang inahan ni Burden sa nakab-ot nga desisyon sa CCTC kini wala matagbaw sa gihimong rekomendasyon.

Matud pa niini nga ila pang hisgutan sa ilang pamilya ang sunod nilang lakang tungod kay giingong dili lang si Bollozos maoy manubag sa nahitabong kapalpakan sa pageant.

Gani gusto sa inahan nga ihatag ngadto sa iyang anak ang mga premyo sa Texters’ Choice Award karong migawas nga si Kimberly gyud ang midaog sa maong special event.

Ang premyo sa texters choice award giingong naglakip sa mahalong cellphone, platinum plan gawas sa plaque ug uban pa. -  BANAT NEWS