Suspek sa LBC robbery nailhan

CEBU, Philippines – Kapolisan sa Minglanilla nangangkong aduna na silay mga pangalan sa mga suspek pagtulis sa LBC duol sa ilang police station sa milabayng adlawng Sabado.

Matud pa ni Sr. Insp. Romeo Santander sa pakighinabi sa Banat News nga ang maong mga tulisan taga syudad sa Talisay ug notado na silang mga tulisan.

Ang kapolisan nakakuha og impormasyon nga nakaingon nga natultulan nila ang gipuy-an sa mga tulisan, dihang ilang gisubay diha sa police station sa maong dakbayan nasutang notado na gyud ang duha diha sa Talisay.

Midumili hinuon pagbutyag si Santander sa pangalan sa duha apan duna nay gilusad nga operasyon batok kanila.

Kagahapong adlawa gipaabot sa kapolisan sa Minglanilla ang affidavit sa teller sa LBC aron mapasaka ang kasong robbery batok sa tulo.

Kahinumduman nga niadtong Sabado kalit nga gisulod sa duha ka armadong tawo ang LBC-Minglanilla branch nga nahimutang gibana-banang 500 metros gikan sa police station.

Ug nadala sa mga kawatan ang kapin sa gatos ka libo nga gipanag-iya sa usa sa mga customer sa maong LBC nga si Anecito Udtuhan ingon man ang P14 mil sa teller.

Masaligon si Santander nga masulbad nila ang maong kaso tungod kay na-identify sa teller ug ni Udtuhan ang tulo sa ilang mga hulagway. (Lelsey Caminade) (BANAT NEWS)