14 ka parisang priso gikasal

CEBU – Katorse ka paresan sa mga binilanggo sa Bagong Buhay Rehabilitation Center (BBRC) gikasal kagahapon sa buntag didto sa maong prisohan sa dakbayan.

Ang mga sponsor sa maong mass wedding mao sila si acting Cebu City Mayor Michael Rama, Cebu City Councilor Jun Pe, Bureau of Jail Management and Penology (BJMP)- 7 Regional Director Chief Supt. Doris Remedios-Dorigo ug Supt. Efren Nemeño.

Matud pa ni Supt. Nemeño nga iyang gipahigayon ang maong mass wedding human niya hisayri nga daghang mga binilanggo ang nagpuyo-puyo diha sulod sa prisohan.

Ang maong kalihokan maoy gihimong espesyal nga gimbuhaton sa paghandom sa ikatulong tuig niyang pagpanguna isip jail warden sa BBRC, dugang pa ni Nemeño.

Ang mass wedding gidumalahan ni Bishop Leopoldo Tumulak, nga nakapalingaw pag-ayo sa mga kinasal.

Si Rama kinsa nakauyon sa pagdumala ni Nemeño sa BBRC karon, mipadayag sa posibleng pagbalik sa mga insentibo ug allowance sa mga jail guards nga giwagtang ni Mayor Tomas Osmeña kaniadto gumikan sa daghang mga anomaliya sa maong prisohan sa wala pa kini dumalaha ni Nemeño. – BANAT NEWS