Way 'supak sa Recla' project sa Cordova

CEBU – Walay bisan usa nga nipadayag og pagsupak sa mga molupyo sa sitio Camolinas barangay Poblacion lungsod sa Cordova sa planong pag-reclaim sa upat ka hektaryang bahin sa ilang kadagatan atol sa gihimong public hearing niining maong proyekto niadtong miaging adlaw.

Si Mayor Adelino Sitoy nipasabot sa gatusan ka mga pamilya nga nitambong nga ang maong proyekto gitumong aron pagpalambo sa ilang lungsod sa higayun nga mahingpit na unya ang kahumanan niini ug kabuksan na ang pier area sa ilang lugar nga magsilbing access sa mga kasikbit nga isla sama sa Bohol.

Ang project consultant sa lungsod, Bert Dano mipasalig sa mga molupyo ilabi na sa mga mananagat nga dili sila makulban sa ilang panginabuhian.

Kini tungod kay gamay ra kaayo ang upat ka hektaryang hunasan sa ilang dagat ang maigo niini ug makapadayon gihapon sila sa ilang pangisda.

Samtang kadtong mga residenteng direktang maigo sa proyekto gipasaligan sa lungsod nga maoy unang makabenipisyo niini pinaagi sa mga trabahong mamugna sa kalamboan sa dapit.

Gipaabot nga masugdan kini sa bulan sa Marso ug molungtad lang og usa ka tuig ang pagpatrabaho niini. – BANAT NEWS