Pamilya ni Gogong pabiling nasubo

CEBU – Mipadayag sa ilang kasubo ang kabanay sa gipatay nga negosyante sa lungsod sa Daanbantayan gumikan sa kalangan sa kaso ug pabilin nga gawasnon sa mga tawo nga ilang gitumbok nga maoy utok sa krimen nga nahitabo mga onse na ka buwan ang milabay.

Si Juliet Arrogante, asawa sa gipatay nga si Renerio "Gogong" Arrogante miingon nga hapit muusa ka tuig human sa linuog nga pagpatay sa iyang bana, apan hangtud karon hinay kaayo ang dagan sa kaso.

Samtang adunay nadakpan nga maoy gitumbok nga maoy nagpusil patay ni Gogong Arrogante, apan ang kabanay sa gipatay miingon nga adunay mga nagpaluyo sa maong pagpatay nga hangtud karon pabilin nga gawasnon.

Nanawagan si Juliet sa mga awtoridad nga mapadali ang kasulbaran sa maong kaso ug mataral sa hukmanan kadtong mga tawo nga mao gayud ang nagpaluyo sa pagpatay sa iyang bana.

Usa ka Army Sargeant Moises Ludoc ang nadakpan sa mga ahente sa National Bureau of Investigation human kini gitumbok nga maoy nagpatay kang Arrogante.

Hinoon mipadayag ang mga pamilya ni Arrogante sa pagdakop ni Ludoc, apan menus ang ilang pagtuo nga kini nag-inusara sa maong krimen. Nagtuo sila nga kabahin lang ang suspetsado sa halapad nga plano pagpatay ni Gogong.

Mga kabanay ni Gogong Arrogante nga nagpuyo na karon sa nasud sa Australia nanawagan sa gobiyerno nga mapadali ang husay sa kaso.

Gani misang-at man sila og petisyon sa nasud sa Australia nga manginlabot sa kamatayon ni Gogong gumikan kay kini usa man ka Australian citizen.

Mihimo na usab sila og awhag ngadto ni Presidente Gloria Macapagal Arroyo nga unta muhimo usab sa mando sa kasulbaran sa kaso.

Usa ka sulat ang gipadala sa pamilya ngadto ni Presidente Arroyo nga nagsaysay sa hitabo ug mibutyag sa ngalan sa ilang gidudahan sa maong pagpatay. – BANAT NEWS