CEBU – Ipasaka na karung adlawa ang kasong robbery with homicide batok sa duha ka suspetsado sa pagpatay sa Iranian nga si Ashkan Aminian ug sa laing duha ka suspetsado sa pagtulis ug pagpusil sa usa ka estudyante sa Bigfoot-Mactan nga si Pauline Denisa Osorio.
Gi-presentar sa Cebu City Police Office ang tanang suspetsado ug mga saksi sa pagpatay sa Iranian kagahapong adlawa inubanan sa duha ka suspetsado sa pagpanulis pusil sa estudyante.
Matud pa ni Sr. Supt. Patrocinio Comendador nga daan na siyang nagtuong ilaha dayong masulbad ang maong mga kaso tungod kay duna may mga saksing mipatim-aw inabagan sa mga ebidensya.
Apan iyang giklaro nga dili kini epekto o resulta sa pagbiay-biay kanila sa mga kritiko kundili tungod kini sa kooperasyon sa mga tawo diha sa Kalunasan.
Si Malbert Rama, tag-iya sa motorsiklong gigamit pagtulis ug pagpatay kang Aminian gamiton isip testigos batok sa duha ka suspek.
Nasutang ang upat ka mga suspek sa maong duha ka krimen pulos lang managsilingan sa barangay Kalunasan ug gituuhang mga sakop sa usa ra ka grupo nga manulis sa downtown ug uptown area. (Lesley Caminade) (BANAT NEWS)