Flashflood sa Santander, Samboan

CEBU – Gatusan ka mga residente sa lungsod sa Santander ug Samboan naigo sa nahitabong flash flood atol sa pagbunok sa makusog nga ulan niadtong Sabado.

Lima ka mga barangay sa Santander ang naigo sa baha, samtang tulo ka barangay ang naigo sa Samboan.

Si Police Sr. Insp. Richard Oliver, hepe sa kapolisan sa Santander nga gikahinabi sa Banat News nagkanayon nga ang lima ka barangay nga naapektuhan sa landslide tungod sa pagbaha sugod sa alas 3 sa hapon niadtong Sabado mao ang barangay Pasil, Talisay, Liloan, Looc ug Kanlumakad.

Samtang ang Regional Disaster Coordinating Council mibutyag nga ang mga barangay Bato, Tangbo ug Poblacion sa Samboan ang naigo sa flashflood nga miresulta sa pagkalubong sa lapok sa mga balay sa maong tulo ka barangay.

Si Rdo. Padre Ronaldo Sagnoy, kura paroko sa parokya sa Samboan, nagkanayon nga unang higayon nga giigo og flashflood ang lungsod.

Sumala pa niya nga adunay mga balay nga totally washed out ug adunay nangalubong sa lapok ug nangaigo sa bato nga gianod sa tubig-baha.

Matud pa ni Sr. Insp. Oliver nga sa ilang inisyal nga nakuhang report, mokabat sa 30 ka pamilya sa barangay Pasil ang naapektuhan human usab ang ilang mga panimalay nangaguba sa dihang gibanlas sa tubig-baha ingon man mga bato gikan sa bukid.

Samtang usa ka mananagat sa barangay Pasil nga nailang si Rudy Lozano nagpabiling missing hangtod kagahapong adlawa human wala na kini makapauli sa iyang pagpanagat niadtong Sabado sa buntag.

Ubay-ubay usab sa mga hayopan sa nahisgutang lugar ang nangaanod sa maong flash floods.

Gitataw niini nga hapit katunga sa barangay Talisay nabanlas sa baha ug ang mga dagkong bato nga miali sa dalan niadtong Sabado nakapabara sa dagan sa trapiko.

Hinuon daling nakapahigayon og ‘clearing operation’ nga nahuman mga alas 2 kagahapon sa kaadlawon.

Matud pa niini nga si Mayor Wilson Wenceslao sa Santander maoy nangunay sa pagsuperbisar sa engineering department sa munisipyo sa pagpabuldos sa mga yuta ug bato nga gidala sa baha.

Sa pagkakaron, maayo na ug kaagian na sa pagbalik ang lugar.

Si PO1 Anthony Aba sa Santander Police Sation nga gikahinabi sa usa ka estasyonan sa radyo nagkanayon nga adunay kahoy nga taytayan ang naputol, ingon man nangaguba nga karsada sa dihang misugod pagkusog og bundak ang ulan niadtong Sabado sa alas 10 sa buntag nga maoy nakaingon sa pagdagayday sa tubig baha.

Si Melita Mariano, social welfare officer sa Santander nga gikahinabi sa Banat News nagkanayon nga sa ilang inisyal nga nakuha, adunay upat ka totally damaged sa barangay Talisay ug unom niini ang partially damaged.

Samtang sa barangay Pasil, totally damaged usab ang 30 ka panimalay. Hinuon walay gikatahong nangaangol o namatay sa trahedya.

Sa pagsulat ning balita, ang kapolisan ingon man ang grupo ni Mariano nagpadayon sa pagsuhid sa mga barangay diin duna pay wala ma account nga nabanlas nga balay.

Gibutyag niini nga ang mga pamilyang naapektuhan naa karon misaka sa ilang mga paryente gumikan kay wala pa silay mga evacuation center.

Si Mariano nagkanayon nga sa pagkakaron, kapin pa sa 50 ka balay ang nalista nga naapektuhan sa baha sa barangay Talisay ug Pasil, apan padayon pa ang ilang pagsuhid sa laing tulo ka barangay. – BANAT NEWS