CEBU – Usa na karon ka first class municipality ang lungsod sa Argao, human masayri ang kamatuoran nga milamwas diay ang kinitaan niini gikan sa minimum income nga gikinahanglan sa usa ka first class municipality.
Sa miaging tuig gi-down grade sa Bureau of Local Government Finance (BLGF) ang status niini gikan sa pagka-second class ngadto sa pagka-third class municipality.
Ang pagka-first class municipality karon sa Argao, maoy resulta sa “ motion for reconsideration” nga gipangayo sa mga opisyales sa lungsod ngadto sa taga BLGF diin gibatbat nila didto ang kadako sa ilang tinuig nga kinitaan itandi sa record nga gibasihan sa maong ahensya sa pag-down grade nila sa status sa maong lungsod.
Ang maong mosyon nahimo dihang nakurat ang taga Argao ug mihuyhoy ang ilang abaga dihang gihimo kining 3rd class municipality sa BLGF sa miaging tuig.
Ang usa ka first class municipality, may minimum nga kinitaan matag tuig nga P55 milyones.
Apan segun sa kuwentada sa kinitaan sa Argao dihang giayo kini sa pagsubay sa mga tinugyanan sa panalapi sa lungsod, nasuta nga mikabat sa P78 milyones ang kinitaan niini matag tuig karon.
Nunot niini gihangop sa mga opisyales sa lungsod sa Argao ang kalamboan nga gipadala ni Maria Visitacion Obesa, executive director sa BLGF nga mibag-o sa status sa maong lungsod, gikan sa pagka-third class niini, ngadto na sa pagka- first class municipality.
Sa iyang bahin si Mayor Edsel Galeos sa maong lungsod mibati og hilabihang kalipay ug nahuwasan siya sa kasubo gikan sa dakong dimalas nga nasinatian sa Argao.
Kini sa dihang gikan sa pagkalukapa sa status niini, gisundan usab sa pagkatak-op sa Filipino Rural Bank diha sa maong lungsod.
Karong first class na ang maong lungsod hayan nga mosaka usab ang mga benepisyong matagamtaman sa mga opisyal ug kawani sa kagamhanan sa maong lungsod. (Rey Pasaporte) (BANAT NEWS)