Gipusil sa tigbakayan

CEBU – Dughan sa electricians natusak sa bala human gipusil sa wala mailhing tawong nagmotorsiklo samtang nagtan-aw og tigbakay diha sa Sto. Niño St., barangay Hipodromo ning dakbayan sa Sugbu mga alas 3:00 pasado kagahapon sa hapon.

Ang biktima giila sa kapulisan nga si Lando Panta, taga sitio Cahipa sa barangay Hipodromo nakaangkon og duha ka samad pinusilan sa dughan gikan sa kalibre.45 pistola.

Ning pagsuwat ang kapulisan nangita pa kun asang hospital dinhi sa dakbayan sa Sugbu gidala sa usa ka taxi ang biktima.

Matud pa ni PO1 Joel Rosales sa Mabolo Police Station nga gikahinabi sa Banat News ang biktimang si Panta bag-uhay palang naabot sa dapit diin dunay gipahigayong tari sa manok tungod sa ilang kapistahan.

Apan samtang nagtan-aw kalit nga mibutho ang suspek nga sakay og motorsiklo nga walay plaka ug niparking daplin sa dalan, ang suspek daling mipusil kang Panta duha ka higayon.

Si PO1 Rosales nagkanayon nga ang mga tawo didto sa lugar wala gyud makamay-ong sa suspetsado ingon man sa kolor sa motorsiklo gumikan sa ka kalit sa panghitabo, duha ka slug ug usa ka basiyo sa .45 kalibreng bala ang nakuha diha sa crime scene.

Wala pa nila matino ang motibo sa pagpamusil kini tungod kay ang biktima giingong walay kontra sa ilang lugar og gani ang trabaho niini mao lang ang pagpangpakyaw sa mga panimalay nga magpataud og kuryenti. (Guam Logroño) (BANAT NEWS)