LBC duol sa presinto gitulis

CEBU – Bisan pipila lang ka metros ang presinto sa Minglanilla Police Station wala kini panumbalinga sa tulo ka wala mailhing tulisang misakiyo sa kapin P14 mil nga cash ug tsekeng mokabat sa P95 mil alas 12:30 kagahapon sa udto.

Ang gitulis mao ang LBC Hari nang padala diha sa Poblacion Ward III lungsod sa Minglanilla.

Si Sr. Insp. Romeo Santander, ang hepe sa kapulisan sa Minglanilla nga gikahinabi sa Banat News nagkanayon nga ang tulo ka mga tulisan nagsakay’g motorsiklo sa ilang pagsibat diha agi sa barangay Tungkil Minglanilla, ug nilapos ngadto sa barangay Pooc dakbayan sa Talisay.

Matud pa niini nag-inusara ra ang teller nga si Elva Villareal, 23, ug walay gwardiya ang maong establisamento maong gisayon-sayon lang kini og tulis.

Sumala pa niini ang drayber nagpaabot lang sa motorsiklo nga kolor itom ug puwa gikatahong itumon ang pamanit ug tambukon ang panglawas ug may ban-aid sa nawong niini.

Samtang ang duha ka armadong maoy misulod sa LBC gibana-banang 5’4 pataas ang mga height, usa niini tambukon ang panglawas ug itomon gihapon ang pamanit samtang ang usa gamayon ug pution ang pamanit.

Gikatahong ang duha nagdalag .45 pistola ug midiretso og tion sa teller nga si Villareal, dayong deklarar og tulis ug gisakiyo ang P14,670 nga cash.

Wala pa matagbaw ang duha, hasta ang kustomer nga si Anecito Udtuhan taga Poblacion Naga giapil sa paghimulbol ug gikuha ang tseke niining nagkantidad og P95 mil, cellphone, pitaka nga adunay P100.

Matud pa ni Santander nga dihang nadawat nila ang alarma dali gilayon silang nipahigayon sa hot pursuit operation apan wala na nila maapsi ang mga tulisan.

Sumala pa niini nga mga 500 meter lang ang gilay-on sa LBC gikan sa ilang police station apan mga 5-minutos na ang milabay human sa tulis una pa mipahibalo ang teller kanila sa nahitabo.

Gituohan niini nga ang mga tulisan taga dakbayan sa Talisay human usab nakita sa mga estambay nga didto gyud niagi sa barangay Tungkil nilapos sa barangay Pooc sa dakbayan sa Talisay.

Hinungdan nga nitawag sila sa Talisay alang na sa pag-block sa dalan apan nahanaw kini dihang naabot sa barangay Pooc.

Sa pagkakaron nagpadayon pa sila sa pag-kooperar sa kapulisan usab sa Talisay aron sa pagsuta kun wala ba usab sa rouge gallery niini ang mga tulisan.

Gihulagway niini nga mga bagito pa ang maong mga tulisan gumikan sa paagi sa pagtulis apan iyang giangkon nga nakadawat sila’g intelligence reports nga nia na dinhi sa Sugbu ang usa ka dakong robbery gang. –BANAT NEWS