Gidudahang lider sa mga rebelde nasikop sa military
Cebu - Usa ka gidudahang “top-leader” sa New Peoples Army nasikop sa mga sakop sa Armed Forces of the Philippines ug sa Philippine National Police pasado alas onse sa buntag niadtong Huwebes sa Casili, lungsod sa Consolacion.
Si Ramon Patriarca alyas Willy/Aking/Duro/ug Robert giila nga labing taas nga lider sa rebelding NPA, nga nadestino isip lider sa Central Visayas.
Ang grupo sa PNP Cebu ug ang Centcom nagkahiusa aron dakpon ang suspetsado sa dihang paingon kini sa panimalay nga iya sa gihinganlan og Inday. Nagsakay kini og motor atol sa pagkasikop.
Ang pagsikop sa maong lider gibase lamang sa warrant of arrest nga giisyu ni RTC Branch 25 Judge Edito Enemecio sa Danao tungod sa kaso nga “rebellion”.
Si Major General Armando Cunanan, commanding general sa Central Command nagkanayon nga ang pagsikop ni Patriarca bunga sa kampanya sa Centcom nga limpyuhon ang Negros Island sa dili pa mahuman ang 2009 masikop na ang mga dagkong lider sa mga rebelding komunista nga mibatok sa gobyerno.
Nakuha sa mga kamot ni Patriarca ang duha ka granada, usa ka .45 kalibre, usa ka cellular phone, dokumento nga adunay nakarekord nga mga pinansyal nga report ug pitaka nga adunay sulod nga nagkantidad og P11,200. - Lesley Caminade (BANAT NEWS)
- Latest
- Trending
