Cebu - Naalarma ang chairman sa Cebu City Office for Substance Abuse Prevention (Cosap), Felix Jose Lazarte, sa nagkadaghang mga kawani sa kabarangayan sa dakbayan nga tigamitan og ginadiling drugas.
Kini subay sa mga resulta sa gipahigayong random drug testings sa Cosap sa mga barangay sa siyudad sukad niadtong tuig 2006.
Niingon si Lazarte nga sa maong tuig, lima lang ka kawani sa kabarangayan nga naglakip sa barangay tanod ang napositibo sa paggamit og illegal drugs.
Niadtong tuig 2007, 12 usab ka mga trabahante sa pipila ka barangay sa dakbayan ang napamatud-an nga mga adis-adis.
Apan ang maong gidaghanon nidoble sa miaging tuig human 24 ka kawani sa kabarangayan ang nadiskubrehan sa Cosap nga tigamitan og ginadiling drugas.
Apan niadto lang miaging buwan, onse na ka mga trabahante gikan sa upat ka barangay sa dakbayan ang napositibo sa paggamit og shabu.
‘Kadaghan pa sa mga botante sa barangay nga walay bisyo nganong pilion man gyud nang kadudahan nga manggamitay,” sumala ni Lazarte.
Subay niini nihagit ang Cosap chairman sa mga barangay officials nga angayang limpyohan ang ilang mga sakop gikan sa mga tigamitan og ginadiling drugas.
“Supposed to be ang mga barangay officials and workers mao ang frontliners, so, dapat sila maoy magsilbing modelo diha sa ilang barangay,” sumala ni Lazarte.
Ang chairman sa Cosap nisugyot ngadto sa mga barangay officials nga mas angayang ilakip sa mga rekisitos pag-hire og kawani ang drug test result. - Elly Bolonos (BANAT NEWS)