'Tulisan' misukol sa polis napusilan sad

Cebu - Napusilan sa usa ka bagitong pulis ang usa ka armadong lalaki nga gidudahan usab nga tulisan dihang misuway og dagan human gisugdan og rekisa ang mga pasaherong kalalakin-an sa pasaheroang jeepney diha sa dalan C. Padilla sa barangay Sawang Calero sa mga sakop sa San Nicolas Police station kagahapon sa kaadlawon.

Nalup-og sa dalan human maigo sa walang bitiis ang suspetsadong tulisan nga si Jolie Padigos, 23, human gikatahong mibawos og pusil si PO1 Rodel Dimaangay nga sakop sa maong police station.

Matud pa ni SPO3 Reynaldo Origenes, mibutang sila og checkpoint sa maong dapit tungod sa nadawat nga radio report nga adunay tulis nga nahitabo sa downtown area.

Sa dihang ilang gipara ang usa ka jeepney nga may rotang Mambaling namatikdan nilang lahi kaayo ug nag-alingasa ang lihok ni Padigos dihang gipakanaog na ang mga kalalakin-ang pasahero.

Sa pagkanaug sa maong suspetsado kalit kining midagan paingon sa dalan Fegueroa sa barangay Sawang-Calero hinungdan nga gigukod kini sa mga polis apil na si PO1 Dimaangay uban sa sakop sa Barangay Intelligence Network nga si Alvin Alvarado sakay sa motorsiklo sa naulahi.

Dihang naapsan gikatahong nagkupot gihapon sa iyang .357 rebolber ang suspek ug dihang gipahunong kalit niining gipusil ang duha apan swerteng walay naigo kanila.

Diha-diha mibawos si Dimaangay ug naigo si Padigos sa walang bahin sa paa maong nalup-og kini ug nadakpan, nakuha diha sa iyang posesyon ang kalibre .357 paltik rebolber nga adunay duha ka buhing bala.

Kasong Attempted Homicide ug Illegal Possession of Firearm ang gikatakdang ipasaka batok sa suspek. -  BANAT NEWS