Cebu - Usa ka minor de edad nga gidudahang sakop sa grupo sa mga tulisan gi-hold sa mga sakop sa Theft and Robbery Section (TRS) tungod sa pagtuo nga aduna kini kalambigitan sa pagpatay sa Iranian national nga tinun-an sa University of the Visayas sa kursong B.S. Biology.
Si Sr. Supt. Patrocinio Comendador, direktor sa Cebu City Police Office, nagkanayon nga adunay nadawat nga impormasyon ang iyang buhatan kalabot sa lima ka tawo nga maghatag og yawe sa kasulbaran sa kamatayon sa Iranian national nga si Ashkan Aminian, 20.
Ang suspek nga nagpangidaron og 17-anyos gi-pick up sa mga sakop sa Homicide Section ug TRS sa barangay Kalunasan ug giimbitar nga paatubangon sa kapolisan aron ipaubos sa tactical interrogation.
Si Comendador nagkanayon nga niadto lang Miyerkules nadawat ang impormasyon kalabot sa minor de edad, apan niadto lang Huwebes nila na-verify ang intelligence report hinungdan nga kagahapon lamang kini giimbitar sa iyang mga sakop.
Matud pa ni Comendador nga seryoso nilang gitutokan ang anggulo nga tulis ang motibo sa pagpatay kang Aminian.
Gitataw sa direktor sa kapolisan sa siyudad nga ang minor de edad gikatahong miyembro sa usa ka grupo nga kusog mangigo bisan asa nga lugar sa dakbayan, lakip na sa Juana Osmeña Extension, Capitol Site. Si Aminian napatay sa naasoy’ng lugar niadtong Enero 22 sa kaadlawon.
Samtang si Comendador miingon nga dili pa sila makahatag og impormasyon kabahin sa kamatayon ni Aminian, kini nagkanayon nga ang minor de edad nga ilang gi-hold adunay sobra na sa napulo ka mga kaso nga pagpanulis nga giatubang niini sa korte.
Si Sr. Insp. Michael Anthony Bastes, hepe sa TRS, nagkanayon nga sobra sa napulo ka kaso nga giatubang sa minor de edad kasagaran naka-blotter sa Fuente Osmeña Police Station.
Si Chief Insp. Arnel Banzon, hepe sa Fuente Osmeña Police Station, miasoy nga iya pa nga i-verify ang report kabahin sa mga kaso sa minor de edad pinaagi sa pagsusi sa mga rekord sa pagpanulis nga gikalambigitan niini nga giingong na-blotter sa police station nga iyang gialagaran.
Apan giklaro ni Comendador nga wala nila dakpa ang minor de edad, kun dili giimbitar lamang nila kini subay sa imbestigasyon nga ilang gihimo alang sa kasulbaran sa kamatayon ni Aminian.- BANAT NEWS