Cebu - Ang hepe sa ihawan sa Talisay City nga si Dr. Galileo Larawan nanghimakak sa pasangil nga naghinobra ang mga trabahante sa ihawan kun mabuntag itandi sa gabii nga maoy tingdas-ag sa mga ihawonong hayop.
Matud pa ni Larawan sa pakighinabi sa Banat News kagahapon nga ang ihawan adunay 80-90 ka mga kawani ug sa maong gidaghanon unom lang niini ang mga regular ug ang uban pulos na mga job order.
Si Larawan kinsa sa samang higayon maoy City Veterinarian sa Talisay nagkanayon nga usa sa ilang problema mao ang pag-ilis-ilis og mga tawo nga gastoso kaayo og panahon sanglit kutob sa bag-ong makasulod, gikinahanglan pang bansayon sa trabaho nga itahas kaniya.
Gipasabot ni Larawan nga kasagaran sa mga job order nga trabahante molahutay lang gikan sa usa ka buwan hangtod sa tulo ka buwan ug papahawaon dayon kini segun sa kontratong gipirmahan niya.
Bahin sa giingong daghan ang trabahante mabuntag, si Larawan nagkanayon nga hunahuna ilang na sa uban, apan ang tinuod daginuton kaayo ang mga trabahante sa maong ihawan. - BANAT NEWS