Public hearing sa pletihan way klaro

Cebu - Wala pay segurong mahinayon ang gitakdang public hearing sa Land Franchising and Regulatory Board (LTFRB) sa Manila nga motuki sa dugang rollback sa pletihan nga gitakda unta sa petsa 18 karung bulana.

Matud pa ni LTFRB-7 director Romulo Bernardez dihang nahinabi sa Banat News nga kini tungod sa gipatumang lahugay sa ilang buhatan diin pormal nang mo-asumir sugod karung Lunes ang bag-ong gitudlo nga chairman sa LTFRB nga si Alberto Suansing samtang ang kanhi chairman nga si Thompson gibalhin og destino isip undersecretary sa DOTC.

Nunot sa maong lahugay, nagtuo si Bernardez nga posibleng dunay mahitabong adjustment ug moresulta sa pagka-postpone sa maong public hearing kay natigayon kini sa panahon pa ni Lantion.

Ang maong public hearing gitakda nunot sa mga rollback sa presyo sa petrolyo sa mga nangaging buwan ug mipatuman og provisionary rollback nga peso sa minimum nga pletihan ug pagtangtang sa P10 nga add-on sa taxi.

Wala pay bag-ong petisyon og rollback nga gihikay ang LTFRB-7 gawas lang sa karaang petisyon ni Atty. Manuel Iway nga nangayo og P2 nga rollback sa pletihan apan natugutan lang ang peso nga rollback niadtong Disyembre. - Darrel Carumba (BANAT NEWS)