Mga nataktak tabangan makatukod og negosyo
Cebu - Nagtinguha ang kagamhanan sa dakbayan sa Mandaue sa pagtabang sa mga natangtang nga mga kawani sa establisamento nga ilang gitrabahoan pinaagi sa paggahin og salapi alang sa pagbaton og kaugalingong panginabuhian.
Si Mayor Jonas Cortes nga miatubang sa mga kawani sa Giardini del Sole sa iyang pamahayag mipasabot nga nasinati karon nga pagpanangtang og mga trabahante sa mga kompaniya maoy epekto sa nasinati nga global economic crisis.
Dugang pa niya nga ang pagkatangtang sa trabaho sa gitrabahoang kompaniya maoy usa ka hagit alang sa pagpaningkamot sa paglingkawas niini.
Matud pa ni Cortes nga dili lang ang mga natangtang nga kawani sa mga establisamento sa dakbayan sa Mandaue ang nakasinati niini sanglit nasinati usab kini sa uban mga dapit dinhi sa nasud.
Si Cortes mipasabot nga niining panahona maoy labing gikinahanglan ang pagtinabangay alang sa paglingkawas sa kalisod nga nasinati sa katawhan.
Gitataw ni Cortes nga motabang ang iyang administrasyon sa mga nawad-an og trabaho nga mga kawani alang sa livelihood program nga iyang pasiugdahan isip tubag sa ilang panginahanglan. – BANAT NEWS
- Latest
- Trending
