Imahen Sa Birhen Napalgan

Cebu - Gikagubtan sa mga lumolupyo sa Sitio Kabutongan, barangay Landahan, dakbayan sa Toledo ang imahen sa Inahan sa Kanunay’ng Panabang nga nahulma sa dakong bato ug nadiskubrehan sa usa ka 5-anyos nga bata.

Ang 5-anyos nga si Joan Maasin nangahoy sa baol sa iyang apohan niadtong Enero 26 sa dihang napunta ang iyang panan-aw sa usa ka dakong bato nga nahulma ang imahen sa Birhen Maria.

“Katong nangahoy ko sa baol, nakakita ko sa imahen ni Mama Mary sa bato,” matud pa ni Joan sa dihang nahinabi sa Banat News.

Human niya makita ang milagrosong pagtumaw sa imahen, iya dayong gipahibalo ang iyang apohan nga si Lola Flora kabahin sa iyang nakita.

Matud ni Joan nga wala dayon siya tuohi sa iyang apohan hinungdan nga iyang gidala ang iyang Lola Flora sa maong lugar.

Si Lola Flora mismo mihulagway sa imahen sa Inahan sa Kanunay’ng Panabang diha sa dakong bato.

Matud pa sa inahan ni Joan nga si Janet Maasin, gipahibalo dayon sila sa nakit-an sa ilang anak. Lakip ang iyang bana nga si Joel ug ang iyang uyoan nga maoy tag-iya sa baol nga si Sosimo Camoro.

“Nangatawa ni silang duha, kana ganing dala pasi-pasi-aw kay dili gyud sila manuo. Maong paghuman sa pagkatawa sa akong uyoan, gi-atake kini ug nahiwi ang iyang baba. Ang akong bana pod, mihubag pod ang iyang baba,” matud pa ni Janet.

Matud pa ni Janet nga sa upat ka tuig nilang pagpuyo sa lugar atbang sa bato nga nadiskubrehan, ang ilang anak pa gyud ang nakadiskubre sa maong imahen.

Niadtong Lunes sa gabii, gipadamgo ang ilang silingan nga si Damian “Daming” Inggaray sa Mahal nga Birhen nga matud pa kun dili gani aptan ang maong lugar, dili gyud mohunong ang ulan. Nasayran nga pipila na ka semana nga dili maayo ang panahon sa maong lugar.

Niadtong Martes sa buntag, gisaysayan dayon ni Inggaray ang banay’ng Maasin kabahin sa iyang damgo, ug nangunay gyud og butang og atop si Sosimo ug si Joel sa maong lugar.

Human nabutangan og atop ang lugar nga nahimutangan og bato, mihunong dayon ang ulan ug maayo na ang panahon.

Si Joel mibutang usab og hagdan gikan sa ubos paingon sa nahimutangan sa bato nga adunay mihulma nga imahen sa Mahal nga Birhen Maria ug pagkahuman naayo, matud pa, ang hubag sa iyang baba.

Sukad niadtong miaging gabii, ang mga residente sa maong lugar nag-rosaryo atubangan sa dakong bato ug gisaulog usab ang Santos nga Misa.Sukad nabaniog ang milagrosong pagkakaplag sa imahen, daghan na ang milangyaw paingon sa lugar, ilabi na kadtong mga masakiton nga gustong maayo sa ilang mga balatian.

Si Janet miasoy sa Banat News nga sa ibabaw nga bahin sa imahen adunay tubig nga inanay nga nag-agas.

“Usahay mo-agas ni, usahay pod dili. Kung kusog tingali gyud ang pagtuo sa mga nangayo sa tubig, taga-an kini sa Birhen apan gamay ra gyud kaayo,” matud pa ni Janet.

Ang mga residente ug bisita sa maong lugar nagtuo nga ang tubig makaayo sa balatian. – BANAT NEWS