Cebu - Wala ikabalaka ni Cebu City Veterinarian Doctor Alice Utlang ang taho nga daghan na ang nangamatay’ng hayop sa Eastern Visayas tungod sa Salmonella infection.
Matod ni Utlang nga ang nahisgutang bacteria anaa usab sa mga hayop dinhi sa Sugbu nga posibleng makamugna og sakit ug ikamatay partikular na sa mga baboy.
Apan gitataw ni Utlang nga wala sila makadawat og report nga dunay mga hayop sa Sugbu nga nasakit mugna sa salmonella infection.
“Wala tay report nga nadawat nga naay nasakit nga hayop tungod sa salmonella pero kung moingon ka nga naa bay salmonella atong mga baboy naa kay it’s a bacteria nga makita nimo sa mga hugaw sa hayop,” nagkanayon si Utlang.
Timailhan sa mga hayop nga naapektahan sa salmonella bacteria mao ang pagkalibang niini, walay ganang mokaon ug taas ang hilanat.
Ang salmonella infection giingong posible usab nga motakboy sa tawo hinungdan nga gikinahanglan ang hustong pagluto sa karne.
Gani ang regional animal quarantine office sa Eastern Visayas nipasidaan na nga dili haom kan-on sa tawo ang karne gikan sa hayop nga nataptan sa salmonella.
Nasayran nga gi-quarantine na sa gitukod nga interagency task force ang mga baboy ug ubang kahayupan sa Eastern Visayas nga gidudahang na-infected sa salmonella.
Gidili na usab ang pagbiyahe sa mga hayop gikan sa pipila ka dapit sa Samar ug Leyte nga naapektahan sa nahisgutang bacteria.
Nasuta sa usa ka animal health mission nga gipahigayon nga labing minos 700 ka mga baboy sa lungsod sa Santa Rita, Samar ang naapektahan sa salmonella. - Elly Bolonos (BANAT NEWS)