Cebu - Pamilya ni Piskal Patrick Ian Osorio wala matagbaw sa dagan sa imbestigasyon sa pagbanhig sa maong piskal tungod kay hangtud karon bisan motibo ug mamumuno wala pa mahibaw-i sa kapolisan.
Ang amahan ni Osorio nga si Atty. Jesus Osorio,Sr. nakasaway sa kapolisan sa dakbayan tungod kay hangtud karon wala pa gihapon mosibog ang imbestigasyon samtang ang sa dakbayan sa Mandaue tulo ka dagkong krimen nasulbad dayon.
Ang amahang Osorio nga gikahinabi sa Banat News nagkanayon nga ginagmay ra kaayo ang kalamboang giumento sa maong imbestigasyon ug miawhag sa kapolisan ug sa National Bureau of Investigation sa pagdali niini.
Taliwala sa daghang pagsaway sa kapolisan sa siyudad sa Sugbu, ang Cebu City Prosecutor Office mipadayag nga natagbaw pa sila sa gihimo sa kapolisan kalabot sa imbestigasyon sa pag-ambush patay kang Assistant City Prosecutor Patrick Ian Osorio.
Matud pa ni Cebu City Prosecutor Nicolas Sellon nga nakasabot sila sa kalangay sa kapolisan ug NBI nga maoy naglangkob sa Task Force Osorio nga nangita sa suspetsado sa pagpusil-patay kang Osorio niadtong miaging bulan.
Si Sellon nagkanayon nga bisan og hinay ang kalambuan nakita niya ang paningkamot ug kasensiro niini aron mailhan lang ang mga mamumuno.
Niuyon usab si Sellon sa baruganan ni Cebu City Police Office director, Sr. Supt. Patrocinio Commendador nga maoy nangulo sa task force nga dili angayan nga ikumparar ang kaso sa pagpatay kang piskal Osorio ngadto sa tulo ka dagkong kasong pagpatay sa Mandaue City nga dali kaayong nasulbad.
Kini tungod kay mga professional killers mipatay kang Osorio ug walay testigos nga nakakita sa panagway sa duha ka mga mamumunong nagsakay og motorsiklo.
Samtang sa pagpatay kang call center supervisor Lyn Vi Ebarita; Emily Nuñeza ug asawa sa usa ka OFW nga si Maria Jocelyn Mendoza kansang mga killers pulos yamukmok dugang pa niini nga may daghan saksi nga nakakita sa krimen.
Naglaum gihapon ang City Prosecutor nga dili madugay mailhan ra ang suspetsado sa pagpatay kang Osorio ug masikop sa kapolisan. - Chester Abadilla uban sa report ni Darrel Carumba (BANAT NEWS)