1patay, 1 angol gipamusil

Cebu - Usa ang patay samtang usa usab ang angol dihang gipamusil kini sa usa ka armadong tawo nga wala hiilhi didto sa merkado publiko sa Poblacion, dakbayan sa Lapulapu kagahapon sa kadlawon.

 Ang namatay dihadiha mao si Ramie Cosep Arsenio, 27, ulitawo nga taga Sangi, Brgy. Pajo, dakbayan sa Lapulapu, nga nailhang usa ka rugby boy kinsa gipasanginlang daghan og atraso sa pangilkil diha sa merkado.

 Samtang ang angol nailhan usab nga si Evelyn Peñaflor Tampus, 46, minyo, nga taga Sto. Niño ,Basak, Lapulapu City.

 Si PO1 John Philip Silmaro sa homicide section sa kapolisan sa Lapulapu City mibutyag nga nagduwa og dama si Arsenio dihang giduol kini sa kriminal ug gipusil sa walay igong hinungdan.

Nasabak kini sa likod , tiyan ug bukton nga maoy namatyan niya dihadiha.

Samtang si Tampus nga naglakaw sa karsada kinsa nakalitan sa hitabo misiyagit sa iyang kakurat ug gipusil usab siya sa kirminal nga miluthang kang Arsenio.

Nasabak kini sa paa kansang bala nag-ungot pa dihang gidala siya sa tambalan.

Wala pa hidakpi sa kapolisan ang krim inal. - Bong Soriano (BANAT NEWS)