2 lang ka barangay misumite'g budget

CEBU -  Duha pa lang sa 80 ka mga barangay sa dakbayan sa Sugbu ang nakaduso na sa ilang annual budget ngadto sa konseho sa siyudad.

Kini maoy gipahibawo ni Konsehal Joey Daluz, ang chairman sa Committee on Budget and Finance sa City Council.

Matud ni Daluz nga ang duha ka barangay mao ang Basak-San Nicolas ug Mambaling sa habagatang distrito sa dakbayan.

Base sa Local Government Code gikinahanglang isumitir sa barangay ang ilang annual budget ngadto sa konseho sa siyudad alang sa pag-aprubar niini.

Gani ang maong balaud naglatid nga buwan sa Oktobre pa lang matag tuig iduso na ang nahisgutang budget aron pag-abot sa bag-ong tuig kini mahimo nang operational.

Apan hangtud niining higayuna duha pa lang ka barangay sa dakbayan ang nakaduso sa ilang tinuig nga gahin nga anaa na sa buhatan ni Konsehal Daluz.

Giklaro hinuon sa konsehal nga dili maapektahan ang serbisyo sa barangay sa kapakyas niini pagduso sa ilang annual budget kung walay gidugang nga galastuhan.

Kini tungod kay giingong mahimo ra nga i-reenact ang annual budget sa usa ka barangay sa nakalabay nga tuig.

“Dili man hinuon ma-hamper ang barangay operation, maswelduhan gihapon ang mga tawo gawas kung nidugang sila og personnel,” sumala ni Daluz

Subling gipahinumduman ni Daluz ang kabarangayan sa paggahin og usa ka porsiyento sa ilang annual budget alang sa mga senior citizen ug sa juvenile system.

Kini aron dili nila ipabalik ang iduso nga annual budget ug mosamot na hinuon kalangay ang pag-aprubar sa City Council niini.

Kahinumduman nga sa hinapos nga bahin niadtong miaging tuig, dunay giluwatang bahad si Konsehal Gerardo Carillo ngadto sa kabarangayan sa dakbayan. (Elly Bolonos)      (BANAT NEWS)