Mitulis patay sa taxi driver gikasohan na

CEBU - Pormal nang gipasakaan og kasong robbery with homicide ang suspetsado sa pagtulis ug pagpatay sa taxi driver niadtong Sabado sa kaadlawon diha sa barangay Bulacao, Talisay City.

Ang gipasakaan og kaso mao si Dennis Brute, 25, taga Candihay, Bohol apan kasamtangan nga nagpuyo sa Tabok, Mandaue City ug duha ka mga wala pa mailhing mga kaubanan.

Ang biktimang si Carlito Sampaga, 61, nakaangkon og samad pinusilan sa tiyan nga nakaingon sa kamatayon niini ug may samad usab pinaakan diha sa iyang mga bukton.

Si Supt. Henry Biñas, hepe sa kapolisan sa dakbayan sa pakighinabi niini sa Banat News mibutyag nga ang mga tulisan ang misakay kang Sampaga gikan sa barangay Basak, San Nicolas, dakbayan sa Sugbo paingon sa dakbayan sa Talisay apan pag-abot sa lugar mideklarar og tulis.

Atol sa kaguliyang, nakamatikod ang mga tawo sa buto sa armas sulod sa maong taxi ug nakit-an ang tulo ka mga lalaking nanagan, usa niini si Brute nga daling gigukod ug gidasmagan sa usa ka motorista hinungdan sa pagkasikop niini.

Apan ang unang gihinganlan ni Brute nga iyang mga kauban nga mao ang magsuong Raymund ug Jomas Ramas nga una nang nabalitang maoy kauban ni Brute, gi-clear sa kapolisan tungod kay nasutang nagtumo-tumo lang kini tungod kay niadtong tungura ang managsuon pulos na namahuway ug ang ilang amahan maoy usa sa mitabang sa ubang tawo pagsikop kang Brute.

Matud ni Biñas nga giseguro sa paggukod sa nahisgutang motorista si Brute tungod kay nagkupot kini og pusil.

Usa ka Barrymore Bucao nga barangay electrician sa Bulacao mao nay mipahibawo sa mga polis sa nahitabo ug gikuha si Brute. Sa gihimong imbestigasyon, gipanghinganlan niini ang managsuon nga maoy iyang kauban.

Apan sa gipahigayong follow-up nga imbestigasyon sa mga polis nasuta nga si Brute mag-estambayan diha sa lugar ug nakaila sa magsuong Ramas.

Nakuha gikan ni Brute mao ang usa ka .38 cal revolver nga may duha ka buhing bala ug usa ka kabhang.

Gipangita pa sa kapolisan ang laing duha niya ka mga kauban.   (Chester Abadilla uban sa report ni Brenda Batuto)   (BANAT NEWS)