CEBU - Gipasakaan na og kaso sa Criminal Intelligence and Detection Group (CIDG) ang usa ka big time drug pusher sa lungsod sa San Fernando nga nasakmitan nila og P3 milyones nga kantidad sa shabu dihang ila kining gironda sulod sa iyang balay didto sa sitio Magtalisay, barangay Balud, lungsod sa San Fernando niadtong Domingo.
Ang kasong pagpayuhot sa ginadiling drugas maoy gipasaka batok kang Joselito Navarro, 41, samtang murder usab ang gisang-at sa kauban niyang nadakpan nga mao si Christopher Luna, hingkod, nga silingan usab ni Navarro didto sa Magtalisay.
Si CIDG-7 Regional Director, Sr. Supt. Guillermo Eleazar, maoy misang-at sa maong mga kaso batok kang Navarro ug Luna.
Ang mga ebidensya niini mao ang 640 ka mga gagmay nga paketeng gituohang shabu, upat ka dagkong pakete sa plastik nga shabu ug mga ginamiton sa pagsimhot og shabu, ingon man usa ka cell phone ug P20 mil nga cash nga gituohang halin sa ginadiling drugas.
Si Navarro natala sa illegal drugs watch list sa CIDG ug nahimutang kini isip level 2 drug pusher tungod kay makabaligya kini og tunga ngadto sa usa ka kilo nga shabu matag semana.
Samtang si Luna may pending warrant nga giisyu ni RTC -7 Executive Judge Mienrado Paredes tungod sa kasong pagpatay niini sa usa ka retiradong sundawo nga Amerikano nga si Victor Eugene Noe ug miangol usab sa Pinay nga pangasaw-onon ni Noe niadtong Hulyo 26, 2006.
Si Luna nag-atubang og laing kaso kay nasakmitan usab kini og .45 kalibreng pistola nga walay lisensiya, usa ka magazine ug unom ka buhing bala. (Chester Abadilla) (BANAT NEWS)