CEBU - Boluntaryong mitahan sa iyang kaugalingon ang usa ka mag-uuma nga dugay nang nagtago-tago tungod sa kasong pagpanglugos sa iyang 16-anyos nga kaugalingon niining anak dalaga sa bukirang barangay sa lungsod sa Barili niadtong Lunes sa ala 1:45 sa hapon.
Ang 47-anyos nga suspetsado nakahukom nga motahan sa kapulisan human sa hapit usa ka tuig niining pagtago-tago nagpuyo sa nahisgutang lugar.
Ang suspetsado maoy suspek sa pagpanglugos sa kaugalingon niining anak babaye nga nagpangidaron og 16-anyos niadtong miaging tuig ug namabdos kini hinungdan nga gireklamo kini sa iyang asawa ug mga iyaan nga nidangop sa buhatan sa Department of Social Welfare and Development (DSWD).
Matud pa ni PO3 Job Sarvida sa Barili Police dihang nahinabi sa Banat News subay sa blotter nga gibasehan ang suspek nalutsan kini og warrant nga five counts sa kasong rape in relation to child abuse kon R.A. 7610 sa sala ni Barili RTC branch 60 judge Leopoldo Cañete.
Kasaligang tinubdan mibutyag sa Banat News nga ang 16-anyos nga biktima dili pa kaayo kini dugay nga nanganak samtang naa sa kustodiya sa DSWD.
Matud ni PO3 Sarvida nakahukom nga boluntaryo nga motahan sa iyang kaugalingon ang suspek human sa pipila ka mga bulan nga pagtago- tago niini sa siyudad sa Carcar ug wala na mopauli sa ilang lugar human mabulgar ang maong hitabo.
Usa ka Fredirick Bulibuli, taga barangay Lagang siyudad sa Carcar ang nihatod sa suspek sa iyang pag-surrender sa kapulisan. (Darrel Carumba) (BANAT NEWS)