CEBU - Silot kamatayon ang gipangayo sa mga kabanay sa gipatay’ng empleyado sa MEPZ ngadto sa gipasanginlang mamumuno niini nga si Julius Coton.
Si Leonida Nuñeza Juezan, maguwang sa biktimang si Emily Nuñeza nga nahinabi sa Banat News nagkanayon nga kinabuhi ang giutang ni Coton maong angayan bayran usab niya kini og kinabuhi.
Matud pa ni Juezan dili pa igo ang kinabuhi ni Coton nga ibayad tungod sa niluog niining pagpatay sa iyang igsuon.
Ang biktima gituuhang gitulis, gilugos ug gipatay dayon gitabunan lang og mga sagbot diha sa mingaw’ng dapit sa Mandaue North Reclamation Area niadtong Enero 28 ning tuiga.
Sumala pa ni Juezan, dili lamang usa ka higala, igsuon, anak ang nawagtang sa pamilyang Nuñeza kundi nawad-an usab sila og usa sa ilang breadwinner sa pamilya.
Ang biktimang si Nuñeza nga nagtrabaho diha sa MEPZ-2 sa dakbayan sa Lapulapu magpadalhan og kwarta gikan sa iyang sweldo ngadto sa ilang banay sa lungsod sa Tuburan.
Mapasalamaton hinuon ang pamilyang Nuñeza sa kapolisan sa dakbayan sa Mandaue sa daling kasulbaran sa kaso ilabi na sa team sa Homicide Section nga gipangulohan ni Insp. George Aniñon.
Samtang si Coton dihang nahinabi sa Banat News mipadayag nga andam niyang atubangon ang maong kaso ug angkunon kini atol sa arraignment nga iyang gipatay si Nuñeza.
Mihangyo hinuon si Coton sa pamilyang Nuñeza nga dili siya pasipad-an pinaagi sa pag-sekreto og sukmag kaniya atol na unya nga sugdan ang pagdungog sa kaso.
Sa pagkakaron si Coton gibalhug sa kapolisan sa Station 2 sa Mandaue City Police Office samtang gihikay na ang kaso. (Bong Soriano) (BANAT NEWS)