Kapitan sa barko patay sa motel

CEBU - Usa ka kapitan sa barko napalgan na nga patay sulod sa giabangan niining lawak sa usa ka motel sa Happy Valley, dalan V. Rama, barangay Guadalupe ning dakbayan kagahapon sa alas 9 sa buntag.

Ang mga kawani sa motel mitug-an nga adunay kuyog nga babaye ang kapitan sa barko sa dihang mi-check in kini sa motel, apan ang kapolisan nagkanayon nga ila pa nga susihon ang kamatuoran niini.

Ang namatay giila sa kapolisan nga si Marino Montejo, 54, taga Kingswood Village, barangay Lipata, lungsod sa Minglanilla ug nagtrabaho isip Master Mariner kon kapitan, subay sa Professional Regulation Commission ID nga nakuha sa kapolisan.

Si SPO2 Rey Cuyos, imbestigador sa Homicide Section sa Cebu City Police Office, nagtuo nga sakit sa kasingkasing ang namatyan ni Montejo.

Sumala pa ni SPO2 Cuyos nga ang lawas ni Montejo nagsugod na og panglagum ug wala na kini sapot samtang naghigda ibabaw sa kama sa dihang nakit-an sa mga kawani sa motel.

Wala hinuoy nakit-ang foul play ang kapolisan sa kamatayon sa kapitan, apan girekomendar gihapon nila ang autopsy aron masayran ang tinuod nga hinungdan sa kamatayon niini.

Usa ka roomboy nga si Reckson Llevi, 24, mitug-an nga alas 9 pasado sa gabii niadtong Lunes miabot si Montejo sakay sa usa ka taxi ug mi-check in uban sa usa ka kuyog niini.

Ang mga kawani sa motel nagkanayon nga usa ka babaye ang kuyog ni Montejo. Apan wala sila makabantay sa oras kanus-a kini mibiya sa motel.

Si SPO2 Cuyos nagkanayon nga ilang paninguhaon nga mailhan ug makit-an ang kuyog ni Montejo sulod sa lawak sa motel aron makuhaan kini og pamahayag.

Matud pa sa kapolisan wala hinuon silay nakit-an nga timailhan nga adunay kaguliyang nga nahitabo sulod sa lawak nga giabangan ni Montejo.Ang mga butang sa kapitan kumpleto, lakip na ang mga personal nga gamit ug salapi niini.

Nadiskubrehan sa mga kawani sa motel nga patay na kini sa dihang gituktok sa roomboy ang pultahan sa lawak niini apan wala mangabli hinungdan nga ilang gipugos og abli ug didto nila nakit-an ang lawas niini nga naghayang sa kama nga wala nay sapot ug habol na lamang ang nagtabon niini.   (BANAT NEWS)