Suspensyon sa nars illegal - CSC -Manila

CEBU - Gideklarar sa Civil Service Commission-Manila nga illegal ang tulo ka bulang suspensyon ni Carmenia Sapio, ang nurse sa Vicente Sotto Memorial Medical Center nga naapil sa tulo ka mga personnel sa VSMMC nga gisuspenso tungod sa kalambigitan sa Black Suade Scandal.

Sumala pa sa manlalaban ni Sapio nga si Atty. Joselito Alu nadawat na nila ang final and executory nga desisyon sa Civil Service Commission- Manila nga nagtumbok nga illegal ang suspension ni Sapio.

Gihimong basehanan sa CSC-Manila ang rason nga walay hurisdiksyon sa kaso ang fact finding committee ug ang mga labaw sa VSMMC pagpasuspenso kang Sapio.

Nasayran nga si Alu nisang-at og petisyon sa management sa VSMMC nga libkason ang suspensyon sa iyang kliyente tungod kay ang DOH ra ang may hurisdiksyon sa administrative case samtang ang Ombudsman naghupot sa kasong kriminal labot sa maong eskandalo.

Gimando usab sa CSC-Manila sa VSMMC nga pabalikon sa trabaho si Sapio.

Apan gumikan kay naserbisyuhan naman ni Sapio ang suspension nga 30 ka adlaw gimandoan ang VSMMC sa pagbayad og back wages sa maong nurse.

Dihang gipangutana kun mubalos ba og kiha si Sapio, si Alu niingon nga nagdumili na lamang sa pagpanimalos ang iyang kliyente tungod kay usa kini ka debotong Katoliko ug may nahibilin pang respeto sa iyang labaw nga nasipyat lamang sa pagpasuspenso kaniya. (BANAT NEWS)