P3M nga 'shabu' sakmit sa CIDG

CEBU - Mokabat sa P3 milyones nga kantidad sa gidudahang shabu ang nasakmit sa mga sakop sa Criminal Investigation and Detection Group (CIDG-7) atol sa ronda niadtong Domingo sa kaadlawon sa panimalay sa usa ka gipasanginlang bigtime drug pusher sa sitio Magtalisay, barangay Balud lungsud sa San Fernando.

Atol sa operasyon nasikop usab ang gitumbok nga suspek sa pagpatay sa usa ka retiradong sundalong Amerkano nga gipatay sa barangay Guadalupe sa milabay’ng 2006.

Ang dinakpan giila sa kapulisan nga si Joselito Caballero Navarro, 41, nadakpan pinasikad sa search warrant nga giisyu ni Judge Meindrado Paredes sa Regional Trial Court (RTC-13).

Ang grupo ni Sr. Insp. Patrick Vaño ni-serve sa maong warrant nga niresulta sa pagkasikop kang Navarro ug kauban niining si Christopher Luna, nga gitumbok sa pagpatay kang Victor Eugene Noe niadtong Hulyo 26, 2006.

Atol sa operasyon nasakmit sa kapolisan ang 640 nga gagmay’ng paketeng gituuhang shabu, upat ka dagkong plastic pack nga shabu ug mga drug paraphernalia ug pag-repack niini.

Nakuha usab ang cellphone ug P20 mil nga cash nga gituuhang halin sa illegal nga drugas.

Si Sr. Supt. Guillermo Eleazar ang Regional Director sa CIDG-7 nagkanayon nga si Navarro ilang nabutang sa 2nd level drug pusher gumikan kay maka-dispose kini’g tunga ngadto na sa usa ka kilo matag semana.

Matud pa niini nga sagad sa operasyon ni Navarro sa pagpamaligya sa drugas diha sa mga lungsod sa habagatang bahin sa lalawigan sa Sugbu, diin naila na kaayo kini gumikan kay taud-taud na kining nalambigit sa maong illegal nga kalihukan.

Gibutyag niini nga niadto pang bulan sa Nobiyembre nila gipanid-an si Navarro, giingong sa Cebu ug sa Mindanao magkuhaan og suplay ang suspek.

Si Navarro nga gikuhaan og pamahayag sa mga sakop sa media hugtanong nagdumili paghatag sa iyang komentaryo labot sa iyang pagkasikop.

Samtang si Luna nga dugay nga gipangita ug may warrant of arrest gikan kang Judge Beinvenedo Saniel sa RTC branch 20 human gitumbok sa mga nakasaksi nga usa kini sa nipusil-patay kang Noe ug niangol sa Filipinang fiancée sa langyaw.

Si Luna nakuhaan sa .45 uban sa usa ka magazine ug unom ka mga buhing bala ug napakyas usab sa pagpakitag igong mga dokumento niini, mihimakak hinuon kini sa pasangil sa maong pagpatay.    (BANAT NEWS)