Pagpatay sa Iranian ipadali og sulbad

CEBU - Gipadali na ang kapulisan sa dakbayan sa Sugbu pagsulbad sa pagpusil-patay sa tinun-ang Iranian kansang kaso hangtud karon wala pay hayag nga direksyon.

Ang acting chairman sa Police Coordinating and Advisory Council (PCAC) nga si acting vice mayor Hilario Davide III miawhag sa kapulisan pagpadali sa imbestigasyon.

Kini subay usab sa pasalig ni Acting Mayor Michael Rama ngadto sa ambassador sa Iran nga si Ali Mojtaba Rouzbehani pagsulbad sa maong krimin.

Ang Iranian nga si Ashkan Aminian gipusil-patay niadtong Enero 22 diha sa dalan Juana Osmeña Extension ning dakbayan, tulis ug love triangle maoy gitumbok nga motibo sa kapolisan sa maong krimen.

Matud ni Davide nga iya nang gipakighinabian si Cebu City Police Office Director Senior Superintendent Patrocinio Comendador pagpadali sa imbistigasyon.

Apan nasayran nga hangtud karon wala pay natumbok nga suspetsado ang kapulisan sa pagpusil-patay sa maong Iranian national.

Kini tungod usab sa kakuwang og mga saksi nga mopalig-on sa ilang nahipos nga mga ebidensya pagsulbad sa nahisgutang kaso.

Sa pikas bahin, gipahibawo ni Davide nga ang kapulisan sa dakbayan musugod na pagsuroy sa mga tunghaan nga dunay daghang langyaw nga mga tinun-an.

Kini aron kahatagan og dugang mga pahimangno ang maong mga estudyante alang usab sa ilang seguridad pagpuyo dinhi sa siyudad.

Nasayran nga lakip sa duawon sa kapulisan nga mga tunghaan sugod karong Biyernes mao ang South Western University (SWU) ug University of the Visayas (UV).

Ang Iranian national nga gipatay niadtong miaging buwan, gikataho nga usa ka BS Biology student sa UV.   (Elly Bolonos)   (BANAT NEWS)