Taga-BOPK motabok sa oposisyon

CEBU - Pipila ka mga sakop sa Bando Osmeña Pundok Kauswagan (BOPK) ang nipadayag og interes pagtabok sa oposisyon sa siyudad sa Sugbu.

Kini maoy gibutyag ni Lahug barangay captain Mary Ann delos Santos nga usa usab sa mga haligi sa oposisyon sa dakbayan nga nahinabi sa Banat News.

Matud ni delos Santos nga siya mismo giduol sa pipila ka last termer nga mga konsehal sa siyudad ug nipadayag sa pagtabok sa ilang grupo.

Kini kung walay mamahimong kausaban sa BOPK ug hingpit nang matak-upan ang ilang kahigayunan pagpapili sa laing posisyon ubos sa maong partido.

Nagdumili hinuon paghingalan si delos Santos sa mga sakop sa BOPK nga nipadayag na og interes pagtabok sa ilang pundok.

 “There are feelers pero dili lang gyud ko at a liberty to divulge kay it will remain in confidence pa pero muabot ra gihapon ang panahon,” sumala ni delos Santos.

Sa nasayran may lima lang ka mga konsehal sa siyudad nga mga sakop sa BOPK ang anaa na sa ikatulo ug katapusang termino.

Kini mao sila si Konsehal Christopher Alix, Sylvan Jakosalem ug Nestor Archival sa amihanang distrito sa dakbayan.

Samtang ang mga last termer nga mga konsehal sa habagatang distrito sa siyudad mao usab sila si Konsehal Gerardo Carillo ug Arsenio Pacaña.

Gipadayag usab ni delos Santos nga taas na ang listahan sa oposisyon sa ilang mga kandidato pagkamayor ug bisi mayor sa dakbayan sa umaabot nga eleksyon.

Gani miingon si delos Santos nga usa niini giduso sa mga opisyal sa kagamhanan sa lalawigan nga gustong mupapas sa BOPK sa siyudad.

Ang kapitan nga napildi pagkamayor sa dakbayan sa miaging piniliay nagpanikad na pagpapili pagka-kongresista sa north district.

Kung kini mahinayon, ikaatbang unya ni delos Santos sa nahisgutang posisyon ang anak ni Kongresista Raul del Mar nga si Cutie del Mar. (Elly Bolonos)    (BANAT NEWS)