Textmate nasikop

CEBU - Nasikop na sa kapolisan sa dakbayan sa Mandaue ang “textmate” sa usa ka dalagang empleyada sa Mactan Export Processing Zone nga iyang gilugos ug gipatay unya gitabonan sa kasagbutan sa North Reclamation Area, dakbayan sa Mandaue.

Si Julius Coton, alyas Micheal ug Archie, 26, ulitawo ug lumad nga taga dakbayan sa Zamboanga ug usa ka construction worker gisignit kagahapon sa alas 6 sa buntag sa kapolisan sa sitio Aroma, barangay Subangdaku, atbang sa usa ka mall sa dakbayan sa Mandaue. Nasikop si Coton human sa pipila ka adlaw nga pagpaniid sa Homicide Section sa Mandaue City Police Office pinangulohan ni Insp. George Aniñon.

Pagkasikop ni Coton, nakuha sa kapolisan ang cellphone sa iyang textmate nga si Emily Nuñeza, 24, taga barangay Humogpa, lungsod sa Tuburan ug nag-abang lamang sa barangay Basak, dakbayan sa Lapulapu.

Lakip sa nakuha sa kapolisan mao ang cellphone ni Irene Borja, ang boardmate ni Nuñeza, laing cellphone nga gituohang iya sa laing biktima ni Coton ug ang cellphone ni Coton.

Atol sa pakighinabi sa Banat News, si Coton yano kaayong miangkon sa pagpatay ni Nuñeza sa milabay’ng semana ginamit ang pisi nga gihikot sa liog ug kamot sa biktima.

Matud pa ni Coton nga wala siya’y plano sa pagpatay ni Nuñeza apan napugos siya sa dihang mipadayag ang biktima nga magdala siya og polis sa ilang panagkita didto sa North Reclamation Area diin sila magkita.

Gamit ang usa ka pisi nga iyang nakita duol sa container van nga anaa sa maong dapit, iya kining gigamit sa paghikot sa kamot ug liog ni Nuñeza ug sa dihang nakuyapan kini iyang gilugos ang biktima ug dayong tabon sa mga sagbot nga anaa sa palibot niini.

Giangkon usab ni Coton nga lima na ang iyang biktima gamit ang modus operandi nga manawag og programa sa usa ka FM radio station ug makig-ila-ila og babaye. Kun magkasabot sila sa babaye mahimo niya kining textmate ug makigkita dayon sila sa usa ka lugar. Kun magkakita na, iya kining himulbolan sa cellphone nga dala niini.

Apan gitataw niya nga si Nuñeza lamang ang iyang napatay.

Giangkon usab niini nga daghan siya og ngalan nga gigamit sa pagtawag sa radyo aron makadani sa iyang biktimahon.

Samtang si "Inday Misyel" nga host sa programang "Hi..Pangga" sa Energy FM, nalipay sa pagkasikop ni Coton.

Matud pa ni Inday Misyel nga nakahinumdom siya nga duha na ka higayon nga mibisita si Coton sa ilang sibyaanan ug kun mamisti kini daw sa usa ka desenteng tawo. Karon nga nasikop na kini, andam siya nga motestigo batok sa Coton.

Samtang si Sr. Supt. Orlando Ualat, OIC sa MCPO, mapasalamaton sa iyang mga sakop ilabi na sa Homicide Section nga wala gyud matulog sa pagsulbad sa maong kaso ug nahulog ra gyud sa balaud ang suspetsado.

Gihikay na ang kasong kriminal nga ipasaka batok ni Coton. (Uban sa report ni Romeo Limpangog)   (BANAT NEWS)