Anak patay, papa angol sa ambush

Cebu - Usa ang patay samtang duha ang samaran sa pagpamusil didto sa Barangay Gabi lungsod sa Cordova sa milabay’ng gabii.

Patay diha-diha si Jury Verallo, 39, samtang ang samaran ang iyang amahang si Victor Verallo, 54, pulos mga residente sa sitio Mahayahay barangay Gabi lungsod sa Cordova ug kapatas sa usa ka construction firm.

Laing samaran mao si Jerry Sapio, 29, residente sa barangay Basak dakbayan sa Lapulapu nga usa ka habalhabal driver.

Sa pasiunang imbestigasyon ni SPO1 Ebeneser Cadeliña sa Cordova police nasayran nga luwan ang manag-amahan sa habalhabal ni Sapio gikan sa barangay Maribago dakbayan sa Lapulapu gikan sa trabahoan dihang gipamusil.

Sumala pa sa kapolisan duha ka wala mailhing tawong luwan usab og usa ka motorsiklo nakit-ang nagsunod kanila ug maoy mibanhig sa tulo pag-abot sa hilit nga dapit sa barangay Gabi.

Matud pa ni SPO1 Cadeliña nga unang naigo sa buko-buko si Victor Verallo hinungdan nga gipasirit ni Sapio ang motorsiklo.

Dugang pa ni Cadeliña nga gigukod gihapon sila sa mga suspetsado ug gipusil pag-usab makaduha ka higayon diha na maigo sa ulo si Jorie Verallo hangtod nga nadusmog sa usa ka tindahan ang giluwanan nilang motosiklo, si Sapio samaran sa iyang abaga.

Ang mga lumolupyo sa maong dapit nga naalarma sa maong pagpamusil nga naghimog pakisusi maoy dali nga nakatabang sa mga biktima ug gihatod sa tambalanan sa dakbayan sa Lapulapu.

Ang duha ka samaron gidali pagdala sa Mactan Doctors Hospital ug gibalhin sa Vicente Sotto Memorial Medical Center.

Matud pa ni Jury wala sila makaila sa mga suspetsado gumikan kay nagsul-ob kini og full-face helmet ug dali sad kaayong mipasirit palayo sa maong dapit.

Gidudahan sa kapolisan nga adunay kalambigitan sa trabaho sa manag-amahan sa construction ang motibo sa pagbanhig kanila gumikan sa impormasyong dunay gitaktak sa trabaho si Victor ug duna usab kini tawong gikasab-an sa nilabay’ng mga adlaw.

Gisusi na karon sa kapolisan kung si kinsa ang mga tawong posibleng may aligutgot sa mga biktima. - BANAT NEWS