Cebu - Gikalipay ni Mandaue City Mayor Jonas Cortes ang kasulbaran sa mga kasong pagpatay sa dakbayan sa Mandaue niining unang bulan sa 2009.
Gumikan sa paningkamot sa mga operatiba sa Mandaue City Police Office pinangulohan sa ilang director Sr. Supt. Orlando Ualat hinungdan sa pagkasulbad sa duha ka linuog nga kasong pagpatay sa asawa sa usa ka OFW ug sa call center supervisor nga gipatay sulod sa Nikki Garden Hotel.
Si MCPO Homicide Section chief George Aniñon mitug-an nga nailhan na nila ang suspetsado sa pagpatay kang Ma. Jocelyn Mendoza kinsa gisulod sa tulisan sa iyang panimalay sa Castelex Road, barangay Cabancalan dakbayan sa Mandaue sa milabayng Enero 4 ning tuiga.
Ang kaso isang-at na inabagan sa mga ebidensya ug pamahayag sa mga testigos ngadto sa piskaliya karong umaabot nga lunes.
Laing nasulbad mao ang kamatayon ni Lynn-Vi Ebarita nga usa ka call center supervisor kansang best friend maoy usa sa mga suspek nga si Jonnelle Enfectana nga iyaha usab kauban sa trabaho.
Si Ebarita napalgang nagsugod na og kadugta sulod sa usa ka garbage bag sulod sa Nikki Garden Hotel sa barangay Subangdako dakbayan sa Mandaue niadtong petsa 22 sa gabii niing bulana.
Gumikan niini nalipay si Cortes sa dagan sa imbestigasyon sa duha ka kaso apan miawhag sa kapolisan nga sulbaron usab sa madaling panahon ang laing kaso sa pagpatay gihapon og usa ka babaye kansang patayng lawas napalgan diha sa Mandaue North Reclamation Area niadtong petsa 28 ning bulana.
Ang labing ulahing babayeng gipatay diha sa Mandaue mao si Emily Nuñeza nga usa ka empleyado sa MEPZ-2 nga gidudahang biktima sa pagpanglugos una pa patya sa lalaking iyang nakaila sa text pinaagi sa usa ka radio FM station.
Si Ualat sa iyang bahin mipadayag nga 24-oras nga nagpadayon ang iyang mga operatiba sa pagsulbad sa maong mga kaso ug dili sila moundang hangtod dili kahatagan og hustisya ang kamatayon sa biktima. - Bong Soriano (BANAT NEWS)