Cebu - Gisakmit sa kapolisan sa dakbayan sa Mandaue ang unom ka mga videoke nga nahimutang duol sa simbahan sa Saint Joseph Parish Church sa barangay Centro sa dakbayan sa Mandaue sa miaging adlaw.
Si PO3 Jesson Gayo sa Mandaue City Police Office (MCPO) miingon nga ang pagsakmit sa maong mga videoke nga naglakip sa TV monitor ug videoke box, gihimo gumikan sa mga reklamo nga ilang nadawat gikan sa publiko.
Matud pa niya nga sa sayo pa, daan nang gipahimangnoan ni Mayor Jonas Cortes ang mga tag-iya sa maong mga videokehan sa dili pagpatukar sa panahon nga magmisa ang kaparian sa simbahan.
Apan bisan sa maong pagdili, wala kini panumbalinga sa mga hingtungdan nga tag-iya, nga maoy hinungdan sa pagluwat og mando sa mayor sa pagsakmit sa maong mga butang.
Nasayran sa Banat News nga ang videoke nga gisakmit sa kapolisan, nagkantidad og P50,000 ang matag usa ug kasamtangan kining gihipos sa kapolisan sa ilang buhatan isip ebidensya sa kasong ilang ipasaka batok sa mga tag-iya sa maong mga videoke. - Romeo T. Limpangog (BANAT NEWS)