Cebu - Ang hepe sa kapulisan sa dakbayan sa Sugbu Sr. Supt. Patrocinio Comendador nipahimangno sa publiko nga likayan gyud ang pagpakigtagbo niadtong mga tawong ilang nakaila pinaagi sa text diha sa mga programa sa radio station ug sa uban pang pamaagi.
Ang maong pahimangno giluwatan ni Comendador subay usab sa kamatayon ni Emily Nuneza, 24, taga barangay Tumugpa, Tuburan, kawani sa Mactan Economic Processing Zone sa barangay Basak dakbayan sa Lapulapu, kinsa gituohang gilugos ug gipatay sa tawong iyang gika-textmate diha sa may North Reclamation Area dakbayan sa Mandaue.
Matud pa ni Comendador nga angayan ilhon gyud una kun si kinsa ang mga tawong ilang textmate aron sa ingon di sila mameligro.
Samtang gikinahanglan usab nga kadtong mga babayeng dunay ka-textmate dili mag-inusara kun makigkita sa ilang textmate sa labing unang higayon ug likayan ang mga mingaw nga lugar.
Mipasidaan si Comendador nga ang usa ka tawong makigkita sa usa ka hilit nga dapit kadudahan na kaayo ang intensiyon ug di angayang tubayan ug mas maayong kalimtan nalang tungod kay dako ang kahigayunan nga aduna kini dautang buhaton. - Guam Logroño (BANAT NEWS)