Text program sa radyo giundang na

Cebu - Mipahibalo kagahapon sa ilang independenteng desisyon ang DyKT Energy FM sa pagpahunong sa ilang dating program nga giingong maoy nahimong hinungdan sa nahitabong paglugos ug pagpatay sa usa ka 24-anyos nga factory worker.

Si Roger Calupe, station manager sa maong estasyonan atol sa gipahigayong monthly meeting kagahapon sa Kapisanan ng mga Brodkaster sa Pilipinas nagkanayon nga nakahukom silang ihunong ang programa nga maoy giingong hinungdan nga ang biktima ug suspetsado nagka-textmate.

Sumala pa ni Calupe mogama na lang sila og laing programa.

Ang Energy FM nakahukom nga hunongon ang ilang programa human nga si Emily Nuneza napalgang patay na niadtong Enero 28 diha sa kasagbutan sa North Reclamation Area sa dakbayan sa Mandaue.

Ang biktima katapusang nakit-an nga dunay nakakuyog nga lalaki niadtong Enero 23 nga giingong iyang naka-textmate tungod sa programa sa maong estasyonan.

Si Carlo Dugaduga tsirman sa KBP nagkanayon nga ang KBP o Energy FM dili liable sa nahitabo kang Nuneza.

Apan tungod kay ilang gi-acknowledge ang ilang social responsibility ngadto sa publiko mipahigayon sila og mga precautionary measures nga dili mahimong instrumento sa samang krimen. - Brenda D. Batuto (BANAT NEWS)