UV: 10% decrease sa tuition sugod sa summer

Cebu - Agi og tampo aron mamenusan ang epekto sa nasinating krisis karon sa ekonomiya, ang University of the Visayas mopatuman og 10-percent nga tuition fee decrease sugod karong 2009 summer class hangtud na sa pagbukas sa school year 2009-2010.

Kini gumikan sa gipaabot nga pagmenus unya sa gidaghanon sa mga enrolees karong umaabot nga bulan sa Hunyo nga epekto sa krisis karon tungod sa kadaghan na sa mga mamumuong nangawad-an og trabaho tungod sa pagsira sa ilang mga gitrabahoang pabrika.

Ang maong tuition fee decrease magpasabot nga P135 matag subject (average gikan sa 3 units) ang ma-save sa mga tinun-an nga magpasabot nga makamenus sila og P3,340 sa ilang usa ka semester nga bayrunon.

Ang maong tuition fee decrease anha ipatuman sa tanang UV campuses nga may mga kolehiyo sama sa mga campus sa Cebu City, Mandaue City, Danao City, Dalaguete ug Toledo City.

Walay labot niini ang mga high schools ug elementary department sa UV sa nahisgutang mga campus tungod kay sumala pa sa kadagkoan sa UV ang ilang mga high schools ug elementary ang may labing baratong tuition fee kumparar sa uban.

Matud pa ni UV Assistant Vice President for Finance Joselito “Jiji” Gullas sa gihimong press conference kagahapon makabenepisyo niini ang mga pamilyang naa sa bracket B,C ug D.

Samtang kadtong mga academic, non-academic, sports ug cultural scholars magpabilin gihapon.

Bugtong di makabenepisyo sa maong tuition fee decrease mao ang mga kursong medicine, dentistry, graduate schools, gawas sa high school ug elementarya.

Si Jiji Gullas nagkanayon nga sa milabay’ng tuig misaka ang gidaghanon sa mga nagpa-enrol sa UV, apan tungod sa krisis karon gipaabot nga mausab kini karong tuiga.

Usa sa rason mao ang posibleng pagbalhin sa laing tunghaan, pag-drop-out, ug ang ulahi mao ang di na makabayad ang mga ginikanan sa pagpaeskuyla sa ilang mga anak.

 Sa iyang bahin si Gerard Anthony “Didi” Gullas, Assistant Vice President for Administration, nagkanayon nga maong wala giapil ang mga kursong Dentistry kini tungod kay 50 ngadto sa 60 porsiyento sa mga tinun-an niini mga langyaw, samtang ang graduate schools sagad dunay kwarta ang mga estudyante niini ug mao usab ang sa mga kursong medisina.

Sumala pa sa mga Gullas, ang desisyon nauyunan apan pinaagi sa sakripisyo sa mga staff sa UV ug sa mga magtutudlo nga iuktaba lang una ang ilang mga salary adjustments ug ang paggasto pagpanindot pa sa mga imprastraktura sa mga tunghaan.

Ang UV maoy labing unang unibersidad nga mipakunhod imbes nga mopasaka og tuition fee, sila usab ang labing una sa paghatag og discounts sa mga empleyado sa gobiyerno nga nagtungha pa gihapon kanila, ingon man ang paghatag og family discounts sa mga managsuong nagtungha.

Nagtuo ang mga Gullas nga pinaagi niining maong lakang dako kini og matabang sa mga kabus nga pamilyang may gipatunghang mga anak sa ilang unibersidad.

“With all these black clouds all over the world, we decided to do this … we know it is just a band-aid cure, but at least we’ve done something,” sumala pa ni Jiji Gullas. - Edwin Ian Melecio  (BANAT NEWS)