Driver patay na sud sa trak

Cebu - Patay nang naabtan sa kauban sa trabaho ang usa ka stay-in driver sulod sa usa ka delivery van kagahapon pasado alas 4 sa buntag sa eskina sa dalan F. Llamas ug Taurus sa barangay Punta Princesa ning dakbayan.

Si Ruben Tahum ,48, sakop sa Double T- Marketing sa nahisgutang lugar naabtan nga migahi na sulod sa delivery van sa iyang kauban sa trabaho nga si Renato Yaco, 23.

Base sa imbestigasyon nga gipahigayon sa kapolisan pukawon unta ni Yaco si Tahum apan wala na kini momata ug wa na usab naglihok hinungdan nga iyang gitawag ang kaubang si Martin Jalou, 51, aron magpatabang.

Ang agalon ni Tahum nga si Benjamin Tan, 63, mao nay mitawag sa Emergency Rescue Unit Foundation apan wala na gyud kini matabang pa. Wala pa matino sa kapolisan ang hinungdan sa kamatayon niini.  - Lesley Caminade (BANAT NEWS)