Cebu - Mas daghang kabus ug buotan nga mga tinun-an ang makabenipisyo inig abli sa klase sa scholarship program nga gitanyag gikan sa kagamhanan sa probinsya sa Sugbu.
Kini human gipahibawo ni Gobernador Gwendolyn Garcia kagahapon nga iyang doblehon ang gidaghanon sa mga scholars sa tagsa-tagsa ka munisipalidad sa probinsya sa Sugbu.
Ang gobernadora kinsa maoy chairperson of the Provincial School Board (PSB) niingon nga kasagaran sa mga tinun-an nagagikan gyud sa pamilya nga kabus nga mga Sugboanon nakabenipisyo niini.
Si Desiree Kristina Rita, usa sa mga scholars nga taga lungsod sa San Fernando mitug-an sa mga tigbalita kagahapon nga usa siya sa unang onse ka pioneers nga mo-gradwar karung bulan sa Marso ning tuiga sa kursong Liberal Arts and Commerce diha sa University of San Jose Recoletos.
“Kun wala ang scholarship di gyud ko kaeskwela sa college. Mao nga magpasalamat gyud ko ni Governor Garcia,” matud pang Rita kinsa nagpadayon pa sa iyang internship diha sa PSB
Ang PSB scholarship, sumala pa ni Rita nga libre siya sa tuition fee ug duna pay P1,000 nga allowance matag buwan nga ihatag ug incentives ug commendation isip usa ka graduating scholars.
Niadtong Marso sa miaging tuig ang kagamhanan sa probinsya sa Sugbu nihatag usab og college education assistance sa 56 ka honor students nga ni-gradwar sa pampublikong tunghaan.
Ang scholarship assistance naglakip sa tuition ug miscellaneous fees sa tanang scholars nga nagtungha sa kolehiyo sa pampublikong tunghaan. - Rey Pasaporte (BANAT NEWS)