Exit sa Mandaue Consolacion road ipabalhin sa laing dapit

Cebu - Ang konseho sa lungsod sa Liloan nipasar og resolusyon aron awhagon ang Department of Public Works and Highways (DPWH) nga usbon ang exit point sa Cebu North Coastal Project.

Si Konsehal Francisco Comendador III, kinsa maoy chairman sa Committee on Public Works nihangyo ni DPWH Secretary Hermogenes Ebdane nga ilihay ang exit point sa maong proyekto sanglit anha kini molusot sa atubangan sa simbahan sa San Fernando Rey Parish Church diin molagbas kini diha sa taytayan sa barangay Suba.

Si Comendador nga maoy nangamahan sa maong resolusyon naaprubahan dayon tungod sa nakitang kaayuhan niini ug ang DPWH nalang maoy ilang gipaabot nga mosanong.

Matud ni Comendador ila nang giandam ang plano ug alternatibong agian sa bag-ong exit point.

Sa samang higayon ila usab gipadangat ang ilang hangyo ngadto kang Gobernador Gwendolyn Garcia aron matabangan sila niining ilang lakang nga gihimo.

Sa iyang bahin si Bise Mayor Thelma Jordan nanghinaot nga ang gobernador mo-interbiner sa ilang hangyo tungod kay ang maong proyekto gikatakdang mahuman na karung tuiga.

“The use of the church’s façade or property..is not unlike tearing away part of the church holiness..it amounts to sacred desecration,”matud pang Comendador sa iyang resolusyon.

Ang Cebu North Road Project anha moagi sa taytayan sa barangay Suba nga magdugtong sa national road apan anha kini motapos atubangan gyud sa San Fernando Rey Parish Church diin gihulagway sa mga opisyal sa lungsod nga usa ka historical landmark sa ilang lungsod.

Base sa unod sa resolusyon ni Comendador nagkanayon ang exit route paingon ngadto sa baybayon maoy pinakanindot nga paagi tungod kay menus ang maapektuhan nga mga balay ug pribadong estraktura.

Mikabat sa P2.3 bilyones ang gigahin nga pundo sa nasudnong kagamhanan diin anha magagikan sa Mandaue City, lahos na ngadto sa Consolacion ug Liloan.

Kini maoy gihatagan og prayoridad atol sa pagduaw dinhi ni Presidente Gloria Macapagal Arroyo ning bag-ohay lang nga maoy alternatibo ug luag nga agian sa mga sakyanan nga mobiyahe paingon didto sa amihanang bahin sa lalawigan sa Sugbu. - Rey Pasaporte (BANAT NEWS)