Igsuon sa kapitan naghikog

Cebu - Patay ang igsuon sa kapitan human kini maghikog kagahapon pasado alas 7 sa buntag sa balay niini sa Quijano Compound, barangay Calamba ning dakbayan.

Si Maria Bella Quijano, 25, lumolupyo sa nahisgotang lugar ug igsuon ni Kapitan Victor "Jojo" Quijano sa Calamba, naghikog sulod sa iyang lawak sa wala masuta nga hinungdan ginamit ang nylon nga adunay kolor nga yellow ug aduna usab gitas-on nga 21 pulgadas.

Base sa imbestigasyon nga gipahigayon sa kapolisan nga nakit-an na lang sa ka-live-in partner nga si Annalou Sandoval alyas Metos 27, nga nagtindog nga nagbitay sulod sa iyang lawak human kini siya wala tubaga sa dihang nanuktok kini.

Si Metos wala kasabot sa iyang gibati hinungdan nga misinggit siya ug nangayo og pakitabang sa ina-ina sa biktima nga si Luz Quijano. Sa pag-abli sa lawak sa biktima dali kining gikuhaan sa hikot ug daling gidala sa Cebu City Medical Center apan gideklarar kini nga dead on arrival.

Nasayran sa kapolisan nga ang biktima nakig-inom pa kini gawas sa ilang panimalay pagkagabii uban ang tulo ka mahuyang ug ang kapuyo niini. Nakuha usab sa kapolisan nga dili palang dugay nga nagkabuwag ang biktima ug kapuyo niini. - Lesley Caminade( BANAT NEWS)